Mơ̆ng akŏ thun 2026 truh kơ ră anai, truh hrơi pă, Jơnum min mơnuih ƀôn sang să Hàm Tân, tơring čar Lâm Đồng pioh mông “Pơhmư̆ hăng ră ruai tom mơnuih ƀôn sang” ƀơi sang să hlao mơtăm. Ơi Trương Quang Lập, dŏ pơ să Hàm Tân lăi, bruă anai ñu lăng lăp djơ̆ biă, djru brơi mơnuih ƀôn sang dưi pơhiăp tom hăng khua mua amăng să: “Hơdôm mơta hră pơ-ar bơdjơ̆ nao lŏn tơnah, hmư̆ glêh glar, hơmâo tơlơi hil biă mơn, samơ̆ yua pioh mông hrơi pă pơhiăp tom ană plơi pla, jing ƀing khua ăt pơtô brơi ƀing gơmơi thâo ngă hiưm pă mơ̆ng djơ̆, mơ̆ng tañ ƀiă”.

Bơ ơi Lê Văn Hòa lăi nao pran jua ngă bruă mơ̆ng ƀing khua, mơnuih mă bruă amăng să tui anai: “Tui hăng kâo lăng, ƀing mă bruă pơ anai kjăp bruă, samơ̆ yua phrâo pơplih jơlan hơdră ngă bruă anun jing dŏ kaih mơn. Sit biă ñu, djŏp pô leng kơ mă bruă gir, bơwih brơi mơnuih ƀôn sang klă soh yơh. Kâo rai pơ anai ngă hră yua lŏn, giong anun hră pơ-ar tơlơi đăo, jing kâo lăng gơñu ngă bruă klă laih”.

Mơ̆ng hrơi pơphun ngă bruă truh kơ ră anai, gong gai să Hàm Tân hơmâo čơkă hmư̆ 320 wơ̆t tơlơi pơgôp hiăp akŏ pơdong gong gai să hăng pơsir brơi hlao lu tơlơi aka ƀu rơđah, tơnap tap mơ̆ng neh met wa amăng mông nao ngă hră.

Ƀu kơnong ƀơi Hàm Tân đôč, ôh, mơguah hrơi rơma amăng akŏ rơwang hrơi tơjuh blan 7 anai, phường Phú Thủy ba pơƀuh hơbô̆ bruă “Mơñum kơphê mơguah mơ̆ng khua mua phường hăng mơnuih ƀôn sang”. Bruă anai pơhưč lu mơnuih lăp pơđing hmư̆.

Gong gai phường Phú Thủy brơi thâo, bruă pơphun jơlan hơdră “Mơñum kơphê mơguah” sa blan sa wơ̆t, hơmâo ngă pơplih nao rai ƀơi 12 ƀut plơi. Yă Nguyễn Thị Minh Ngọc, Khua jơnum min djŏp djuai ania mơnuih mơnam Việt Nam phường Phú Thủy lăi dlăm, bruă anai kiăng ngă djơ̆ hăng tơlơi pơtrun “jê̆ mơnuih ƀôn sang, giăm plơi pla”: “Hăng hơdôm tơlơi dưi lăi nao, hăng pơsir hlao mơtăm lĕ ƀing khua git gai laih hơdôm anom bruă lăi pơthâo hlao ƀơi mông mơñum kơphê mơtăm. Bơ hăng hơdôm bruă kiăng sem lăng hră pơ-ar či pơsir lĕ ƀing khua amăng Jơnum min djŏp djuai ania mơnuih mơnam čih pioh, pơƀut glăi, mơit kơ anom bruă dưi pơsir đah mơ̆ng tum pơƀut glăi, git gai pơsir tañ kơ neh met wa”.

Pran jua ngă bruă lĕ lăng anŏ tŭ ư, bơni mơ̆ng mơnuih ƀôn sang hăng sang bruă mơdrô yơh phun ñu jing bang hyu kơtang biă mă. Hơdôm wơ̆t pơphun jơlan hơdră “Mơñum kơphê mơguah” ƀudah hơdôm hrơi “pơhmư̆ ană plơi pơhiăp” glăk ngă kjăp tui pran đăo kơnang, akŏ pơdong sa gong gai ngă bruă kiăo tui pran jua mơ̆ng mơnuih ƀôn sang./.