Tơlơi tơnap tap prong hloh ră anai lĕ pơhưč hăng pơkong ƀing ơi ia jrao dŏ mă bruă glăi ƀơi kual ataih, kual mơnuih djuai ƀiă, yua rơnoh prăk tơlơi djru ba aka ƀu lăp ôh laih anun tơlơi gêh găl pioh yua mă bruă dŏ kơƀah. Đơ đam tơring čar ră anai, hơmâo 135 boh sang ia jrao să hăng 369 anih pioh čơkă pơjrao ječ ameč blunmg a. Mah abih bang sang ia jrao anun, hơmâo ơi ia jrao laih soh, samơ̆ ƀuh rơđah tơring čar ăt dŏ kơƀah lu ơi ia jrao, nai ia jrao, sit biă ñu truh 500 čô. Hrŏm hăng anun, gong gai kơnuk kơna dua gưl ngă kơ jơnum min mơnuih ƀôn sang gưl să ăt dŏ sư̆ rơbư̆ amăng bruă git gai wai lăng mơnuih thâo bruă sa hnơ̆ng, kơƀah tơlơi thâo pơčrâo phara ba bruă, amăng bruă juă nua blơi gơnam yua kơ bruă ia jrao či ngă tui kah hăng sa anom bruă rơngai hơjăn tơlơi thâo.

Ƀơi anăp kơ tơlơi anun, ƀơi mông jơnum, mă bruă phrâo anai hăng Grup hyu sem lăng mơ̆ng Jơnum min pơsir anŏ kiăng mơnuih ƀôn sang gah Anom bruă khua pơ ala mơnuih ƀôn sang dêh čar, Jơnum min mơnuih ƀôn sang tơring čar Gia Lai hơmâo rơkâo đĭ hăng Gơnong dlông tañ ngă hră pơtrun, pơtô ba sa hnơ̆ng kơ pơčrâo bruă mă, ngă khua, pơkă mrô mơnuih mă bruă tui hăng mrô mơnuih ƀôn sang hăng anih dŏ phara hơjăn; laih dơ̆ng djru prăk kăk blơi yua gơnam mă bruă kơ sang ia jrao să hăng plơi pla. Lăi rơđah anŏ phara hơjăn yua tơlơi tơnap tap kual ataih, yă Nguyễn Thị Thanh Lịch, Kơ-iăng khua Jơnum min mơnuih ƀôn sang tơring čar Gia Lai kah pơpha tui anai:

“Tơring čar hơmâo ming pơkra glăi mơ̆n lu jơlan hơdră kiăng pơhưč mơnuih  mă bruă samơ̆ ăt ƀu hơmâo ơi ia jrao glăi mă bruă pơ plơi pla ataih ôh. Sang ia jrao, anom bruă ia jrao tơnap laih ƀơi tơring glông hlâo kơ anun, glăi pơ să, plơi pla jai kraih tơnap hloh, arăng ƀu gưt glăi ôh. Ră anai, rơnoh prăk pơhưč mơnuih rơgơi, ơi ia jrao glăi mă bruă pơ kual ataih lĕ 600 klăk prăk lu hloh, pioh brơi kơ ơi ia jrao prăk apah sang dŏ. Gơmơi dăp hơdră, pơpha hyu ơi ia jrao, brơi nao mă bruă pơblih nao rai. Yua kơ brơi nao mă bruă mơ̆ kơƀah gơnam yua mă bruă, kơnong huač tơlơi thâo mơ̆ng ƀing ơi ia jrao, lơ̆m anun pơ sang ia jrao prong, ƀing ta ăt kơƀah lu mơ̆n”.

Bơni kơ tơlơi lăi tơpă tui anun mơ̆ng Khua mua tơring čar Gia Lai amăng bruă pơthâo tơlơi kơƀah ră anai, Grup khua mua sem lăng mơ̆ng anom bruă khua pơ ala mơnuih ƀôn sang dêh čar čih pioh tơlơi rơkâo ƀơi Gia Lai sa boh tơring čar nao hlâo pơđĭ tui boh tŭ yua amăng bruă mă. Khă hnun, Grup ăt lăi pơtong, tơring čar khom pơsir anih mă bruă, dăp akŏ bruă pơtô pơhrăm tơdơi kơ gưl prong dơ̆ng, brơi ƀing ơi ia jrao hơđong pran jua mă bruă. Yă Trần Thị Nhi Hà, Kơ-iăng Khua Jơnum min pơsir tơlơi kiăng mơ̆ng mơnuih ƀôn sang gah anom bruă pơ ala mơnuih ƀôn sang dêh čar, Khua grup hyu ĕp lăng tal anai lăi pơtong:

“Gia Lai kiăng tơlơi pơtrun hơgĕt, jơlan hơdră pơpă dưi ngă djop hăng kơtang hloh pioh pơsir tơlơi tơnap ră anai, tơring čar ngă hră rơkâo đĭ bĕ. Grup hyu sem lăng anai hơmâo čih pioh djop hăng tơpă đôč, pioh kơ ƀing ta djru hrŏm sem lăng pơsir hĭ. Abih bang anăp nao kơ ană plơi pla soh, ngă hiư̆m pă kiăng ană plơi pla tŭ mă tơlơi djru mơ̆ng jơlan hơdră mơ̆ ƀing khua mua ping gah, kơnuk kơna ta hlăk dŏ tơguan čang rơmang”.

Tơlơi gum hrŏm hăng pơđing hmư̆ mơ̆ng khua pơ ala mơnuih ƀôn sang dêh čar, amra jing gai pơtrut kơtang hloh pioh kơ Gia Lai pơsir tui ƀơƀrư̆ anŏ gun kơƀah mơnuih mă bruă gah ia jrao, ngă kơjăp tui atur bruă mă gah ia jrao plơi pla, kiăng djơ̆ hăng tơlơi čang rơmang mơ̆ng mơnuih ƀôn sang ƀơi kual lŏn Dap Kơdu hing ang.