VOV4.Jarai-Lu anom bruă bơwih ƀong huă ƀơi tơring čar Dak Lak pơđĭ kyar kơtang biă mă, tơdơi kơ pơdơi sui blan yua bơbeč djơ̆ klin Covid 19. Lu sang bruă sĭ mơdrô ƀơi tơring čar hlăk gir run pơtrut bruă pơkra ming gơnam sĭ mơdrô lơ̆m klin kheng anai dưi pơhrŏ ƀiă. Lu pran jua tơgŭ ngă bruă glăk pơjing rai sa črăn phrâo pơđĭ kyar bơwih ƀong huă amăng tơring čar.

Lơ̆m anih kah pơpha hăng ngă anung gơnam sĭ mơdrô mơ̆ng sang măi pơkra ƀiêr Sài Gòn Dak Lak-kông ty pơčruh ngă pơkra tơpai ƀiêr Sài Gòn kual Tong krah, ƀing mă bruă hlăk dŏ mă bruă git gai măi dưm dăp, pơdŭ pơgiăng  hăng črŏ amăng kơdung amăng kơthŭng gơnam laih pơkra ming, ba nao pơ hơjai dưm gơnam. Khul rơdêh tŏ tui klôn čơ čruai pơdŭ pơgiăng tơbiă mơ̆ng sang măi brơi ƀuh pơkra ming gơnam sĭ mơdrô pơ anai pơphun glăi yơh tơdơi kơ 2 thun bơbeč djơ̆ klin Covid 19.

Ayong Laị Thế Nguyên, mơnuih mă bruă amăng sang măi pơkra tơpai ƀiêr Sài Gòn Dak Lak brơi thâo, dơ̆ng mơ̆ng tơdơi kơ hrơi ngă yang thun phrâo ƀong tết thun 2022, lu bruă mă amăng sang măi dưi rŭ glăi giăm 80% hnong mă bruă, mơnuih mă bruă pơwơ̆t glăi mă bruă kah hăng hlâo laih hăng abih bang khua mua, mơnuih mă bruă amăng kông ty kơtưn mă bruă, kiăng pơkra ming gơnam sĭ mơdrô lu hloh akŏ bruă jao.

Kông ty TNHH rơdêh ôtô pơgiăng gơnam An Phước hlăk mă bruă hăng hnong mă bruă na nao mơ̆ng 130 boh rơdêh  hlăk hơmâo ră anai

“Ƀing adơi ayong mă bruă ngă kông ñơn hăng khua mua amăng kông ty gir run pran jua mă bruă klă, djơ̆ hnong phun kông ty jao, kah hăng mrô gơnam pơkra ming djơ̆ rơnoh pơkă  laih anun kơtưn kiăng pơkra ming lu hloh kơ thun hlâo, klă hloh kơ thun hlâo mơ̆n”.

Kông ty TNHH pơdŭ pơdŭ pơgiăng hăng rơdêh ôtô An Phước, Dak Lak ăt găn rơgao sa črăn tơlơi tơnap tap lông lăng hang 107 rơbâo tơn gơnam tam brơi pơgiăng amăng 3 blan akŏ thun. Ơi Phạm Thanh Đông, Khua kông ty TNHH rơdêh pơgiăng gơnam An Phước, Dak Lak brơi thâo, ră anai kông ty gơñu ngă giong 100% hnong bruă mă yua khul rơdêh pơgiăng. Hrom hăng hră arăng rơkâo apah rơdêh juăt ngă hrom mơ̆ng hlâo, kông ty tŭ mă lu hră rơkâo apah rơdêh pơgiăng pơkŏn dơ̆ng.

Ơi Thanh brơi thâo, boh tơhnal anai lĕ, yua kơ khua mua kông ty hơmâo pơsir đut tơhnal amăng bruă jŭ yap prăk kăk yua, prăk kăk apah samơ̆ ăt pơhlôm djop rơnoh prăk blơi ia săng ia jâo hăng rơnoh prăk duh jia pơkŏn, mah djop mơta prăk apah lêng kơ đĭ soh:

Ƀing gơmơi ăt pơdah thâo hơdră, hơduah ĕp lu anom bruă sĭ mơdrô gơnam pioh blơi pơkra ming gơnam sĭ mơdrô ăt mă bruă hnong đôč. Rơngiao kơ anun, ƀing gơmơi ăt hơmâo lu hơdră pơkrem ia săng ia jâo, biă mă ñu gơmơi gir run ngă hrom bruă khom gơnam kah brơi rơdêh đuăi, ƀu dưi đĭ hyu soh sel ôh. Pơgiăng nao hơmâo gơnam, glăi ăt khom hơmâo gơnam pơgiăng mơ̆n hnun kah huăi rơngiă mông, huăč prăk ia săng soh sel”.

Hơdôm anih pơphun ngui ngor ƀong huă gah rơngiao ăt dưi pơphun pơ lu anih anom pioh kơ tuai čuă ngui, anun yơh

lu tuai nao pơ Dak Lak ruah mă

Găn rơgao hơdôm hrơi blan tơnap tap hloh, tơlơi hơdip mơda mơnuih ƀôn sang ƀơi Dak Lak ră anai ăt pơwơ̆t glăi kơdŏk kơdor laih. Kơnam pah klin kheng ƀu kơtang dơ̆ng tah, lơ̆m abih bang čơđai sang hră glăi hrăm hră pơ anih hrăm laih soh, hrom hăng anun, sang ia jrao ăt ngă giong bruă mă gơñu laih anun glăi mă bruă kah hăng tơđar, hrom hăng djop sang hră pơtô hrăm. Amăng hrơi mông mă bruă djơh hăng anun, anom bruă tuai čuă ngui dưi tŭ mă pran kơtang pioh rŭ glăi….

Yă Nguyễn Thụy Phương Hiếu, Kơ-iăng Khua Gơnong bruă Gru grua Boh thâo pơrơguăt drơi jăn hăng Tuai čuă ngui Dak Lak brơi thâo, rŭ glăi bruă tuai čuă ngui ƀơi Dak Lak dưi ngă tui djơ̆ hơdră pôr pơthâo pơhưč bruă tuai hyu ngui hơdeč hmar,  tŭ yua pôr pơthâo djop plang tơlơi pơhing. Kơnang kơ boh tơhnal pơtruh nao rai, pok pơhư prong djop mơta hơdră čơkă tuai laih anun kơnang kơ bruă pơđĭ tui anŏ yua bơwih bơwăng kơ tuai, pơkra ming sĭ mơdrô pơhưč pran jua tuai blơi djă pioh mơ̆ng djop sang bruă hơmâo ngă laih:

“Gơmơi ngă bruă pôr pơthâo amăng dua thun rơgao lu biă mă hăng kơtang mơ̆n, anun yơh ƀing tuai hyu ngui gơñu ƀuh rup rap anun mơ̆ng tơring čar Dak Lak hăng kiăng ngă bruă hyu ngui ĕp lăng, gơñu dăp mông gêh găl pioh hyu ngui pơdơi pơdă amăng hrơi ngă yang huă pơsat pơtao Hùng, lu tuai nao ngui gơñu mơak biă mă, nao ngui lu mơ̆n, ră anai tuai hyu ngui ƀơi Dak Lak hlăk rŭ glăi, djop sang bruă sĭ mơdrô hlăk gir run hơduah ĕp bruă ngă hrom hăng djop plơi pla. Kiăng kơtưn pơhưč ƀing tuai mơ̆ng jar kmar nao pơ Dak Lak khom ngă hrom hơdôm tơring čar Khánh Hòa, ƀôn prong Đà Nẵng”.

Tuai hyu ngui kiăng găn rơgao amăng bruă mă mơak amăng anih tuai čuă ngui ƀơi plơi Kŏ Tam

Kiăng ngă tui klă bruă rŭ glăi bơwih ƀong huă mơnuih mơnam thun 2022-2023, phrâo anai Jơnum min mơnuih ƀôn sang tơring čar Dak Lak hơmâo ngă hơdră hyu ngui rŭ glăi hăng pơđĭ kyar bơwih ƀong huă mơnuih mơnam thun 2022-2023, amăng anun anăp nao tơhnal pơkă rŭ glăi tañ hloh bruă mă pơkra ming, sĭ mơdrô amăng tơring čar, pơtrut bruă ngă kiăng pơđĭ kyar; đing nao hơdôm bruă mă phun yôm; kiăng ngă djơ̆ tơhnal pơkă bơwih ƀong huă mơnuih mơnam hơmâo pơkă. Ơi Nguyễn Đình Trung, ding kơna ping gah dêh čar, Khua git gai Ping gah tơring čar Dak Lak brơi thâo:

“Tơring čar hlăk brơi pơkă glăi hơdră mă yua lŏn tơnah, pơkă glăi bruă pơđĭ kyar djop kual. Pơhlôm klă, djơ̆ hăng anŏ kiăng mơ̆ng anom bruă rai tuh pơ alin amăng tơring čar, hơmâo tơlơi gêh găk kơsem min hnun kah arăng nao ĕp lăng hăng pơsit tuh pơ alin. Dua dơ̆ng lĕ ngă hrom hơdôm sang bruă pơkra ming, anai lĕ bruă glăm ba mơ̆ng tơring čar, tơring čar amra ngă hrom hăng hơdôm sang bruă pơkra ming gơnam sĭ mơdrô laih anun sang bruă ba hyu sĭ mơdrô.

Klâo dơ̆ng lĕ, sĭ mơdrô gơnam khom lir hơbit hăng anih tuh tia pơkra ming prong hăng anih pơdong sang bruă, jơlan glông nao rai gêh găl. Amăng tơlơi dưi ăt kah hăng tơlơi gơgrong ba mơ̆ng tơring čar, amra ngă gêh găl klă hloh”.

Amăng hrơi ngă lơphet hơdor glăi tal pơklaih rơngai kual Dơnung hăng hrơi jar kmar pơdơi mă bruă, Dak Lak jai ƀuh lu tuai nao ngui, tơlơi bơwih ƀong huă hơmâo tơhnal găl hloh, tuai hyu ngui čih anăn rơkâo dŏ sang jưh tuai kơniă laih, anih naom hyu ngui, hyu ĕp lăng ăt kơniă laih mơ̆n. Hơdôm anih tuh tia pơkra ming amăng tơring čar hlăk pok prong bah amăng čơkă tuai mơnuih mă bruă; mơnuih rơkâo nao mă bruă apah pơ dêh čar tač rơngiao ăt lu mơ̆n tơdơi kơ dưi pơhrui truh 1 klai dolar thun 2021.

Hơdôm hmua kơdư đang phun boh vải, boh nhẵn ta juăt lăi boh jrang, boh ƀrô yuăn truh bơyan pĕ boh laih hăng boh lu, nua sĭ mơdrô ăt đĭ đăi mơ̆n, pok brơi sa jơlan čang rơmang phrâo rŭ glăi tơlơi bơwih ƀong huă ƀơi tơring čar Dak Lak.

            Nam Trang pô čih –Nay Jek: Pơblang