Anai lĕ thun hơmâo lu tơlơi pơhing hloh mơ̆ng hlâo truh ră anai, hơmâo 116 mơta tơlơi pơhing ba pơplông mơ̆ng 78 čô mơnuih čih, khul grup čih tơlơi pơhing, lu hloh 24 mơta pơkă hăng thun hlâo. Boh tơhnal, Jơnum min mơnuih ƀôn sang tơring čar Dak Nông hơmâo ngă hră pơsit 54 mơta tơlơi pơhing pioh apah bơni pri Tơlơi pơhing rơgơi hloh tơring čar Dak Nông tal VII, thun 2022,  hơmâo 5 mơta tơlơi pơhing, pơtui jua pơhiăp, pơdah rup tivi, hră pơhing in, tơlơi pơhing plăng internet hăng rup pơhing.

Ơi Võ Ngọc Tú, Khua sang bruă Khul čih tơlơi pơhing tơring čar Dak Nông, Khua anom bruă Hră pơhing Dak Nông lăi, hơdôm mơta tơlơi pơhing pơplông tal VII tŭ yua hloh wơ̆t mrô hăng anŏ rơgơi pơkă hăng thun hlâo. Lăp đing nao, lu tơlơi pơhing hơmâo čih ră ruai kơ bruă mă rŭ glăi, pơđĭ kyar bơwih ƀong huă tơdơi kơ tal klin kheng Covid 19 ngă.