Amăng hrơi blan Việt Nam anăp nao tơhnal kiăng asăp dơluh đĭ ayuh djah trrun mrô 0 amăng thun 2050, sang măi apui ayuh dưi hơmâo lu khua mua bơlăi nao, pơblang tum teč apui yua lu hăng kơtang, kiăng pơkĕ yua djop hơđong hăng rơnoh bơtơbiă djah carbon ƀiă đôč. Hơmâo apui yua anai amra djop brơi rơnoh apui yua amăng glông hrĕ apui yua amăng dêh čar, laih dơ̆ng djru pơkĕ hrŏm apui yua hăng djuai apui yua hơdjă huăi ngă sat kơ rơngit adai pơblih ayuh hyiăng kah hăng apui pơkĕ hăng jua angin laih anun pil pơ-iă yang hrơi.

Sa amăng hơdôm tơlơilăp đing nao ƀơi mông jơnum anun, ruah mă boh thâo ia rơgơi pơpă ming pơkra apui yua kiăng hơđong rơnuk rơnua. Lu mơnuih rơgơi kơhnâo hơmâo pơčrong sai kơ bruă man pơdong sang măi pơjing rai ayuh phrâo, kiăng bơtơtư̆ pơdar măi pơkĕ apui môđun anet tui hăng  tơlơi juăt thâo mơ̆ng jar kmar, mơ̆ng anun djru lăi pơthâo boh thâo ia rơgơi či ruah mă pioh man pơdong sang măi apui lơtrik ayuh djơ̆ găl hloh ƀơi Việt Nam. Nai prin tha ơi Trần Chí Thành, Khua sang bruă kơsem min apui lơtrik ayuh Việt Nam, brơi thâo:

“Tui hăng tơlơi kâo pơmin laih anun ƀing kơsem min amăng bruă sem lăng tơlơi rơnuk rơnua, kâo ƀuh hơdră pơkra ming mơ̆ng dêh čar Nga, rơđah biă mă kah hăng anom bruă Rosatom, dêh čar ta hơmâo ruah mă djơ̆ laih, yua hơmâo pok pơhai ngă tui laih ƀơi lu dêh čar. Hơmâo anŏ pơhlom pơgang tơlơi rơnuk rơnua hơđong, ƀing gơmơi khom kơsem min, tong ten biă mă, laih anun ƀuh klă mơ̆n. Anai lĕ hơdră man pơdong klă, dưi pơhlom rơnuk rơnua, hơđong kơ bruă mă, tui hluai ƀuh ñu kơjăp truh hơdôm rơtuh thun mơtam”.

Ƀu kơnong tơlơi ră ruai kơ anŏ či pơkĕ apui yua phrâo ôh, pơkra ming rai put ayuh pơkĕ yua apui lơtrik dŏ jing sa bruă mă kơsem min man pơdong gưl dêh čả. Anun lĕ, khul mơnuih kơhnăk kóem min kơ bruă man pơdong boh tŭ yua yom, tơlơi thâo rơgơi lu, bruă git gai wai lăng, dăp bruă, čih pơkra hơbô̆ man pơdong hăng pơphun bruă mă man pơdong krăp lăng tơdơi anai; laih anun pơtrut bruă pơtô glăi bruă ba yua, tơlơi thâo wai lăng hăng pơđĭ tui ia rơgơi tuh tia pơkra ming amăng dêh čar.

Hăng Khánh Hòa, anih pok pơhai sang măi apui ayuh Ninh Thuận 1 hăng 2, hơdôm tơlơi či kiăng anun khom prăp lui hrŏm hăng khua mua amăng tơring čar. Hrŏm hăng bruă pơklaih ala lơ̆n duh glăi kơ mơnuih ƀôn sang, pơhrua mơnuih mă bruă, prăk kăk tuh pơ alin, sa tơlơi dơ̆ng lăp đing nao anun lĕ pơgang ba tơlơi hơdip mơda, bruă mă, tơlơi bơwih ƀong huă sui thun kơ mơnuih ƀôn sang amăng kual djơ̆ hĭ anih man pơdong sang măi. Ơi Trịnh Minh Hoàng, Kơ-iăng khua Jơnum min mơnuih ƀôn sang tơring čar Khánh Hòa, lăi pơtong:

“Djop ring bruă čuk pơkra jơlan bơwih brơi kơčăo bruă anai khom kơsem lăng tong ten lu črăn, kiăng ngă djơ̆ anŏ pơkă sang măi laih anun djơ̆ anŏ pơtrut pơđĭ kyar brơi gah Dơnung hăng bơwih brơi sui thun kơ mơnuih ƀôns ang amăng kual. Pơdong glăi plơi pla phrâo khom pơsir anih dŏ, anih bơwih ƀong huă, bruă mă, pơtô hră, pơtô bruă mă, bruă ia jrao hăng bơwih brơi tơlơi mơak klă amăng mơnuih mơnam khom hơmâo djop. Boh tŭ yua mơ̆ng bruă pơdong glăi plơi phrâo ƀu kơnong pơkă hăng anŏ ngă hmao kru, jao glăi anih čuk pơdăo đôč ôh, tơlơi tŭ yua hiam hơdip mơda hăng anŏ pơđĭ kyar brơi mơnuih ƀôn sang nao dŏ pơ anih phrâo”.

Dơ̆ng mơ̆ng tơlơi ră ruai kơ bruă man pơdong sang măi apui lơtrik ayuh brơi ƀuh, tơlơi či kiăng pơđĭ kyar amăng rơnuk phrâo ƀu dŏ glăi ƀơi bruă kiăng pơhrua tui rơnoh apui yua đôč ôh. Anun lĕ sa tơlơi pơmin jŭ yap, dăp akŏ klôn djơ̆ rơ-ua, man pơdong plơi pla, atur kơ bruă mă, pơđĭ tui tuh tia pơkra ming ƀơi tơring čar.

Pơđut mông jơnum bơkơtuai, ơi Ngô Đông Hải, Kơ-iăng anom pơtô bruă ping gah dêh čar, lăng yom 19 mơta tơlơi čih pơgôp hiăp, kơsem min ia rơgơi, lu khua mua pơčrong sai hrŏm anŏ gơgrong ba yom mơ̆ng kơčăo bruă man pơdong sang măi apui ayuh, anŏ kiăng boh thâo ia rơgơi, mơnuih mă bruă, jơlan glông nao rai hăng bruă mă hơduah tơlơi pơhing, pôr pơthâo. Pơđĭ kyar bruă apui ayuh lăng yom biă mă amăng abih bang bruă či ngă, jŭ yap dăp hơdră ƀơi tơring čar hăng khom hơmâo tơlơi tŭ ư hrŏm mơ̆ng abih bang mơnuih mơnam. Ơi Ngô Đông Hải lăi pơtong:

 “Djop sang bruă mơdrô pơprong Group bơwih ƀong khom ngă hrŏm tong ten, pơgiong hĭ boh thâo phrâo kơsem min djơ̆ găl, kiăng hơmâo atur tơlơi phiăn pơkă kơ rbuă mă, prăp lui prăk kăk, mơnuih mă bruă thâo rơgơi, jơlan glông nao rai atur man pơdong kơhnâo kơhnăk sit pok pơhai kơčăo bruă anai, kiăng rơnuk rơnua hơđong. Biă mă ñu, ngă hrŏm tong ten bruă pôr tơlơi pơhing, tơlơi pơthâo brơi anŏ kiăng djơ̆ găl amuñ thâo hluh hăng mơnuih ƀôn sang”.

 Apui ayuh, amăng tal kiăng thâo pơčrong sai anai, ƀu kơnong tơlơi ră ruai mơ̆ng anom bruă apui lơtrik đôč ôh. Anun lĕ, sa črăn lơ̆m dêh čar Việt Nam prăp lui man pơdong atur ngă bruă phrâo pơđĭ kyar rơnuk phrâo-anih mơ̆ ia rơgơi tơlơi kơhnâo, mơnuih mơnam mă bruă hăng tơlơi thâo ngă pô kơ ia rơgơi phrâo jing pran kơtang yom biă mă pơtrut lơ̆n ia pơđĭ kyar mơtah hơdjă rơgoh, pơhlom rơnuk rơnua apui yua hăng hrưn đĭ kơtang amăng rơnuk rơbâo thun phrâo.