Bruă amăng 3 blan tal 4 prong, glêh tơnap mơn, kiăng abih bang anom bruă gir kơtưn đĭ amăng hrơi blan tuč rơnuč, Khua dêh čar lăi rơđah, kiăng dưi đĭ kyar 2 mrô, GDP amăng 3 blan tal 4 khŏm đĭ rơbêh 12,5%, yua hnun khŏm kiăng hơdôm ding jum, anom bruă, gong gai gir kơtang hloh.

Khua dêh čar kiăng pơsit rơđah hơdôm tơlơi gêh găl aka ƀu hơmâo mă yua, hơdôm tơlơi djru pơtrut đĭ kyar dŏ glăi; pơklaih brơi hơdôm anŏ kơđông, čih pơgiong tơlơi phiăn, hră pơtrun, pơsir đut tơhnal hơdôm kơčăo bruă aka ƀu dưi ngă, đah mơ̆ng pơhrui djŏp tơlơi gêh găl, tơlơi hơmâo či đĭ kyar. Hrŏm hăng anun, khŏm pơƀut brơi prăk 100% bruă tuh pơ alin kơnuk kơna ngă pô thun 2026, ba hơdôm ring bruă akŏ phun dưi ngă djơ̆ hrơi pơkă. Hơdôm boh tơring hơmâo bruă bơwih ƀong prong khŏm gir hloh, mă yua kơtang djŏp tơlơi hơmâo mơ̆ng pơkra gơnam, tuh pơ alin, blơi yua gơnam, ba sĭ pơ tač rơngiao, hăng tuh pơ alin kơnuk kơna ngă pô. Khua dêh čar kiăng prăp rơmet hlâo hŭi hơmâo bruă pơđĭ nua gơnam, wai lăng kjăp nua ia săng ia jâo, apui lơtrik hăng gơnam juăt yua rim hrơi./.