Mơmot lơ 4/8, ƀơi sang bruă Kơnuk kơna, Khua dêh čar ơi Phạm Minh Chính git gai jơnum lok Sa mơ̆ng Khul git gai bruă Dêh čar pok pơhai Tơlơi pơtrun mrô 68 mơ̆ng Ding jum Kơđi čar kơ pơđĭ kyar bơwih ƀong mơnuih ƀôn sang ngă pô. Tơdơi kơ 3 blan hơmâo tơlơi pơtrun mrô 68, bơdjơ̆ nao rơđah hloh lĕ tơlơi pơplih klă, pơplih tơlơi pơmin mơ̆ng abih bang mơnuih, mơ̆ng gơnong dlông truh pơ plơi pla, khul grup, mơnuih ƀôn sang, anom bơwih ƀong, sang anŏ pơkra gơnam sĭ mơdrô. Bruă pơphun bơwih ƀong kơtang biă mă. Blan 6/2025, kơđŏm gru lăp hơdor lơ̆m mrô anom bơwih ƀong phrâo akŏ pơdong hơmâo rơbêh kơ 24 rơbâo. Blan 7 dêh čar ta hơmâo rơbêh 61 rơbâo sang anŏ sĭ mơdrô phrâo, lu dua wơ̆t pơhmu hăng blan anai thun hlâo.

Ƀơi mông jơnum, Khua dêh čar ơi Phạm Minh Chính lăi pơtŏng, ngă tui lăp djơ̆ djŏp tơlơi pơkă hơmâo ba tơbiă mơ̆ng djŏp Tơlơi pơtrun mơ̆ng Ding jum Kơđi čar, Khua mua pơ ala mơnuih ƀôn sang, Kơnuk kơna wơ̆t hăng tơlơi kiăng mơ̆ng anom bơwih ƀong, anun lĕ ba anom bơwih ƀong mơnuih ƀôn sang ngă pô jing tơlơi pơtrut pơsur yôm hloh či pơđĭ kyar bơwih ƀong huă mơ̆ng lŏn ia. Khua dêh čar kiăng pơtrut pơsir hĭ hơdôm tơlơi gun, tơlơi ngă đom, kiăng anom bơwih ƀong dưi mă yua djŏp kông ngăn hơmâo amăng lŏn ia, pơtô pơjuăt mơnuih mă bruă, boh thâo ia rơgơi, mă yua boh thâo mrô...Tŏ tui čih pơkra hơdră ngă hră pơ-ar amuñ ƀiă, kah pơpha gưl ngă bruă, jao tơlơi dưi pơkra hră pơ-ar kơ hơdôm gong gai. Khua dêh čar ăt kiăng hơdôm boh tơring pơhrua tui, ngă giong hơdră dưm dăp prăp rơmet kơ kơčăo bruă phrâo, laih dong pơƀut čih pơkra hơdôm mơta tơlơi djru kơ anom bơwih ƀong anet hăng găp ƀrô kah hăng apui lơtrik, apah prăk yua lŏn, prăk ngă hră pơ-ar. Pơhiăp tom lu hloh, pơhmư̆ tơlơi pơgôp hiăp čih pơkra tơlơi phiăn, tơlơi pơkă, tơlơi djru mơ̆ng mơnuih ƀôn sang, anom bơwih ƀong hăng sang anŏ sĭ mơdrô.