VOV4.Jarai - Apui lơtrik Daknông phrâo ngă giong bruă pel ĕp glăi, mă yua ring bruă pơkĕ apui, djru 360 bôh sang anô̆ mơnuih ƀôn sang ƀơi plơi Dak Lang, să Quảng Khê, tơring glông Dak Glong.

Mơnuih ƀôn sang plơi Dak Lang mơ-ak lom hmâo apui lơtrik yua amăng sang hăng bơwih ƀong huă

Anai lĕ anih anom kual asuek, mơnuih ƀôn sang hơdip raih daih rim ƀut mơnuih ƀôn sang dô̆, tơlơi hơdip dô̆ lu tơlơi tơnap yua kơ akă hmâo apui lơtrik yua amăng sang hăng pioh bơwih ƀong. Djơ̆ hăng tơlơi čang rơmang mơng mơnuih ƀôn sang, PC Daknông hmâo tuh pơplai laih ring bruă ba apui lơtrik lŏn ia nao pơ̆ plơi Dak Lang, amăng anun: pơdŏng phrâo 4 anih pơkă apui, giăm truh 2,5km jơlan gŏng hrĕ apui găp ƀrô, 5,8km jơlan hrĕ apui tơglưh tơtăng, abih bang prăk mă yua rơbêh kơ 3 klai 500 klăk prăk.

Hmâo apui, ƀô̆ mơta plơi pla phrâo ƀơi Dak Lang, să Quảng Khê, tơring glông Dak Glong hmâo dong tơlơi pơplih phrâo

Lom pơkra pơdŏng, neh wa amăng plơi hmâo ngă gal brơi laih kơ anih anom pioh pơdŏng, djru bruă pơdŏng gŏng apui, dăng hrĕ... kiăng ring bruă tañ giong. Bruă ba apui lơtrik dêh čar truh pơ̆ hơdôm kual djuai ania ƀiă, kual asuek, ataih jing tơlơi gir run mơng PC Daknông hăng tơlơi gum hrom klă mơng plơi pla. Bruă pơkĕ apui hmâo bôh tŭ yua amăng pơdŏng plơi pla phrâo, djru mơnuih ƀôn sang pơđĭ kyar bơwih ƀong, hrŏ trun ƀun rin hăng pơđĭ tui tơlơi hơdip mơda./.

Siu H’ Prăk: Pơblang