VOV4.Jarai - Pơwơ̆t glăi bruă mă tơdơi kơ hơdôm hrơi pơdơi tê̆t, ƀing juăt bruă adoh suang, ngă sen mơng grup adoh suang mơnuih djuai ania tơring čar Dak Lăk prăp rơmet pơtŏp tơlơi adoh suang phrâo. Ơi Y kô Niê, khua grup brơi thâo, hrơi hlâo kơ tê̆t, grup hơmâo pioh lu mông hăng pran jua pơtŏp kơ 2 jơlan hơdră adoh suang čơkă thun phrâo hăng mlăm čơkă thun phrâo arăng iâu giao thừa. Phara hăng hơdôm thun hlâo, yua hơmâo klin anun jing bruă adoh suang kơnong ngă ƀơi Anom bruă gru grua tơring čar đôč laih anun hơmâo pơdah amăng tivi hăng Youtube. Tơdơi kơ hrơi tê̆t, grup amra prăp lui jơlan hơdră adoh suang prong pơƀuh amăng tơring čar hăng nao pơƀuh brơi amăng kual plơi pla bơwih brơi ană plơi pla lơ̆m klin Covid-19 tơdu hĭ.

“Blung hlâo lĕ prăp lui kơ hrơi pơdơi, hrơi ngă lơphet mơng tơring čar hăng lŏn ia. Hlâo kơ hrơi tê̆t lĕ hơmâo ngă laih, ƀong tê̆t giong hơmâo ngă dong mơn. tơdah amăng hrơi klin kheng ƀu thâo ngă ôh lĕ ta mă rup hơdôm jơlan hơdră adoh suang, ngă sen laih anun pơdah ƀơi tivi, glông internet kiăng abih bang mơnuih ƀon sang lăng, wơ̆t hăng gơyut gơyâo ƀơi jar kmar dưi lăng tom”.

Bơ ƀơi Gia Lai, Grup hyu pơtô pơblang mơng Grup adoh suang Đam San (gah Gơnong bruă gru grua boh thâo - bơkơjăp drơi jăn hăng tuai čuă ngui Gia Lai) ăt pơphun bruă hyu pôr pơhing, pơdah pơƀuh tơlơi adoh suang brơi ană plơi hmư̆. hlâo adih, rim thun, Grup hơmâo ngă hơdôm rơtuh tal hyu pôr pơhing pơtô pơblang pơ anai pơ adih, juăt ñu pơ kual ataih yaih, kual mơnuih ƀon sang djuai ƀiă ƀơi tơring čar Gia Lai. Khă hnun, thun 2021 laih rơgao, klin Covid-19 jing ƀu brơi pơƀut lu mơnuih, yua hnun grup pơplih hơdră pơtô pơblang lĕ kuai video, pơdah amăng plang facebook, youtube tui lu tơlơi. Tơlơi anai ƀrô djru pơhlôm dưi ngă bruă arăng jao, laih dong tơlơi pôr pơhing tañ truh hăng neh met wa hloh mơn. Amai H’Blup lĕ mơnuih apăn bruă amăng Grup hyu pôr pơhing mơng Grup adoh suang Đam San brơi thâo:

“Ƀing gơmơi lĕ mơnuih apăn bruă gru grua boh thâo, ngă bruă hyu pôr pơhing pơ anai pơ adih. Gơmơi pơmut hrŏm tơlơi adoh suang, ngă sen kiăng neh met wa pơdơi pơdă tơdơi kơ hrơi ngă bruă glêh glar. Mơng anun gơmơi pơmut hrŏm pơtô pơblang tơlơi pơtrun mơng Ping gah, tơlơi phiăn mơng Kơnuk kơna. Mơng anun, kiăng neh met wa thâo hluh Ping gah hăng Kơnuk kơna lăng ba lu biă kơ tơlơi hơdip mơnuih ƀon sang. Rơngiao kơ anun dong, pơtô brơi gơñu thâo hluh, bĕ hĭ bruă ngă soh sat, huăi ngă sat kơ drơi pô hăng neh met wa amăng plơi”.

Siu H’Mai: pơblang