Mah truh 75 thun laih samơ̆ ơi Thông Long ăt pioh lu mông mă bruă pơyơr pran jua ñu pô, đing nao kơ bruă pơđĭ kyar amăng kual plơi pla mơnuih djuai ania Čăm ƀơi plơi Phú Thuận, să Hàm Thuận Bắc, tơring čar Lâm Đồng. Ƀu kơnong ba jơlan hlâo amăng bruă pơđĭ kyar bơwih ƀong huă, man pơdong plơi pla phrâo đôč ôh, ơi Long dŏ pơđĭ tui tơlơi gơgrong ba pô nao hlâo kah hăng sa asar pơjeh amăng gru grua hiam, hur har pơtrut pơsur mơnuih ƀôn sang gum hrŏm akŏ pơdong glông bruă kơđi čar, pơđĭ tui tơlơi pơmin brơi abih bang mơnuih hur har hloh djă pioh gru grua djuai ania Čăm. Mah ƀu ngă bruă hơgĕt ôh amăng gong gai kơnuk kơna, samơ̆ lu thun laih rơgao, ơi Long jing sa amăng hơdôm čô mơnuih arăng đăo kơnang, sit hơmâo tơlơi hơgĕt bơdjơ̆ sao nao rai ñu pô pơsir hĭ mơak klă.

Ơi Thông Lạc, dŏ ƀơi plơi Phú Thuận, să Hàm Thuận Bắc kah pơpha, hơmâo hơdôm bruă gong gai aka ƀu thâo, ơi Thông Long kah pơpha brơi, tơlơi pơhing. Hơmâo tơlơi bơdjơ̆ sao nao rai pơmin ƀu anăm pơsir hĭ ôh, samơ̆ hăng pran jua hur har gir run  pơtô lăi, djơ̆ rơ-ua hiam klă, ñu hơmâo djru kơ hơdôm bơnah bơtŭ ư hĭ tơdruă.

“Sang anŏ ơi Thông Long arăng đăo kơnang biă mă pơ anai, ơi Long jĕ giăm hăng ană plơi pla, hơdôm tơlơi ñu pơhiăp lêng kơ kiăng ngă bruă djru ană plơi pla soh anun yơh hơgĕt ñu lăi arăng hmư̆, pơđing hmư̆”.

Ơi Thông Long, brơi thâo, tơlơi kiăng prong hloh mơ̆ng ñu lĕ ƀuh ană plơi pla thâo gum pơgôp, tŭ ư hrŏm hăng gong gai plơi pla, kơnuk kơna dêh čar, hơdôm tơlơi đăo pơpŭ nao rai ñu mơak yơh, ñu kiăng ƀuh ană plơi pla ăt khom thâo gum pơgôp, pơdjru nao rai tơdruă đôč.

“Kâo hyu jak iâu mơnuih ƀôn sang ngă djơ̆ jơlan hơdră, hră pơtrun mơ̆ng Kơnuk kơna, ping gah, tơlơi phiăn dêh čar, anăm ngă soh glăi tơlơi phiăn lơ̆n ia ôh. Amăng plơi pla, hơmâo tơlơi hơgĕt bơdjơ̆ sao, nao rai plah wah amăng sang anŏ kâo djru hrŏm ƀing khua mua apăn bruă amăng plơi pla nao pơsir brơi kiăng mơak klă”.

Ăt kah hăng ơi Thông Long mơ̆n, hơdôm thun giăm anai ơi Hùynh Cứng, Kơ-iăng khua Khul đăo Balamôn tơring čar Lâm Đồng ƀu kơnong ngă klă bruă mă wai lăng hăng pơtô tơlơi đăo hơdip tơpă hiam klă đôč ôh, dŏ djru hrŏm amăng bruă mă lơ̆m plơi pla, jing pô pơtruh brơi mơnuih ƀôn sang hăng gong gai kơnuk kơna.

Tơlơi gơgrong ba mơ̆ng khua khul pơtô đăo ƀơi Bắc Bình, tơring čar Bình Thuận hơđăp, ơi Huỳnh Cứng jing mơnuih glăm ba phun tui hơbô̆ anăn “Khua pơtô đăo Balamôn ngă hrŏm pơgang tơlơi rơnuk rơnua-yua tơlơi mơak klă hơdip mơda”. Hơdôm tơlơi pơgôp hrŏm mơ̆ng ñu, djru kơtưn tơlơi jĕ giăm tong ten hloh plah wah kông an hăng ƀing khua djru đăo amăng plơi pla djuai ania Čăm.

Ơi Huỳnh Cứng brơi thâo, ngă hrŏm bruă pơgang tơlơi rơnuk rơnua hơđong lĕ, tơlơi gơgrong ba bruă ngă hrŏm kơ abih bang mơnuih ƀôn sang, kiăng pơgang tơlơi hơdip rơnuk rơnua mơak klă kơ djop sang anŏ, plơi pla hăng dêh čar.

“Kâo pô lĕ amra gir hloh hrŏm hăng gong gai kơnuk kơna, khul djru wai lăng plơi Phan Hiệp kiăng jak iâu ană plơi pla djuai ania Čăm pơ anai pơgang hơđong tơlơi rơnuk rơnua hiam klă hloh. Anăm lui ƀing ană amôn ta tơdơi anai lê̆ luh amăng tơlơi črih čruai, răm ƀăm amăng mơnuih mơnam kah hăng đĭ rơdêh đuăi pơplông, djup hot jrao, tlâ̆o ma túy…tui anun ƀu hiam ôh”.

Mơnuih ƀôn sang djuai ania Čăm ƀơi tơring čar Lâm Đồng hơmâo rơbêh 43.000 čô mơnuih, dŏ pơtum ƀơi 9 boh să kah hăng: Tuy Phong, Liên Hương, Bắc Bình, Hàm Thuận Bắc, Hàm Thuận, Tân Thành, Sơn Mỹ hăng Tánh Linh. Mơnuih ƀôn sang djuai ania Čăm ƀơi Lâm Đồng hơmâo dua glông bruă khul khua mua đăo lir hơbit hăng tơlơi đăo amăng phung wang, kah hăng: Khul khua mua pơtô tơlơi đăo Balamôn hăng Khul khua pơprong đăo Islam Bani tơring čar Lâm Đồng.

Yă Táo thị Mộng Quyên, Khua Jơnum min djop djuai ania mơnuih mơnam să Bắc Bình, tơring čar Lâm Đồng brơi thâo, hơdôm khua mua wai lăng gah tơlơi đăo mơnuih ƀôn sang djuai ania Čăm ră anai, ƀu kơnong djru pơgang ba gru grua djuai ania đôč ôh, dŏ jing ling tơhan mơnuih mă bruă phun yom, hyu pơtô pơblang jak iâu mơnuih ƀôn sang pơđĭ kyar bơwih ƀong huă, man pơdong plơi pla djă piho gru grua hiam, pơgang rơnuk rơnua hơđong amăng khul gum pơgôp djop djuai ania.

 “Ƀing gơñu hơmâo ngă bruă glăm ba prong mơ̆n bruă mă mơ̆ng pô hăng khua mua amăng khul đăo. Rơngiao kơ bruă hyu jak iâu bơkơtưn ngă bruă hrŏm abih bang ană plơi pla, dŏ djă pioh gơgrong ba tơlơi dưi pơgang rơnuk rơnua hơđong hăng pơsir kơđi tơlơi amăng plơi pla. Lu khua mua đăo ngă hrŏm grup hyu pơsir kơđi tơlơi amăng plơi pla, pơsir lu tơlơi bơdjơ̆ sao amăng sang anŏ, kơnung djuai”.

Lăi nao kơ tơlơi gơgrong ba mơ̆ng ƀing khua mua djop tơlơi đăo mơnuih djuai ania Čăm amăng tơring, ơi Võ Ngọc Hiệp, Kơ-iăng khua jơnum min mơnuih ƀôn sang tơring čar Lâm Đồng lăi:

“Tui hăng tơlơi krăp lăng tơlơi pơhing abih bang, ăt kah hăng bưp ră ruai tom ƀơi anăp, lu mơnuih ngă bruă amăng kual plơi pla djuai ania Čăm, laih anun ƀing khua đăo, abih bang đăo kơnang biă mă hăng jơlan hơdră mơ̆ng ping gah, tơlơi git gai mơ̆ng kơnuk kơna, gong gai plơi pla, đăo kơnang nao kơ sa jơlan hơdră hiam klă mơ̆ng ping gah pô git gai, tŭ ư hrŏm pơtrut mă bruă bơwih ƀong huă, hrưn đĭ amăng tơlơi hơdip mơda, pơklaih mơ̆ng ƀun rin, kiăng kơ ƀrư̆ hrơi trơi pơđao, đĭ đăi gŏ amŏ”.

Hăng tơlơi gơgrong, glăm ba mơ̆ng pô, ƀing khua pơtô đăo hlăk djru hrŏm plơi pla, git gai, wai lăng mơnuih ƀôn sang djuai ania Čăm tơring čar Lâm Đồng, ngă klă djop tơlơi pơkă bruă pơtrun amăng plơi pla, lir hơbit hăng mơnuih ƀôn sang lơ̆m plơi pla gum hrŏm akŏ pơdong gong gai kơnuk kơna dua gưl jai hrơi kơjăp kơtang amăng kual plơi pla.