Rơbêh 70 thun, tha plơi Y Yơng Niê Kdăm, dŏ amăng ƀuôn Ea M’Droh, să Ea M’Droh, tơring čar Dak Lak ăt abih pran jua hăng hơdôm bruă hrŏm amăng plơi pla. Amăng hơdôm mông jơnum plơi pla, hơdôm mông bơră ruai rĭm hrơi, ñu juăt pơtă pơtăn neh met wa tŏ tui pran gum pơgôp, ngă tui tơlơi phiăn, djru brơi bruă hrăm hră mơng ană tơčô. Lơm amăng plơi pla hơmâo tơlơi hơget thơ, ñu ăt gum hrŏm phat kơđi, djru brơi hơdôm boh sang anŏ hơmâo tơlơi pơmut hrŏm. Ayong Y Knap, Khua plơi Ea M’Droh brơi thâo, hơdôm bruă mă mơng tha plơi lĕ tơlơi găn rơgao yôm phăn kiăng rơnuk hlăk ai hrăm tui lơm ngă hơdôm bruă ƀơi ƀon lan. “Kâo pô ăt lăng yôm biă mă hơdôm tơlơi gum pơgôp mơng tha plơi Y Yơng amăng bruă pơtô pơblang kiăng ană plơi pla thâo gum pơgôp kah hăng amăng hơdôm bruă pơblang brơi tơlơi phiăn bơdjơ̆ nao tơlơi hơdip, pơsir hĭ hơdôm tơlơi gun, pơsir hĭ kơđi amăng plơi pla. Hăng neh met wa, boh pơhiăp mơng tha plơi lĕ yôm phăn biă mă. Anai ăt lĕ sa tơlơi mơ̆ rơnuk hlăk ai čơđai kar hăng ƀing gơmơi hrăm hăng hla tui.”

Ƀuôn Ea M’Droh arăng hmư̆ hing hăng anăn Ƀuôn Cháy, pơlir hăng thun blan mơnuih ƀôn sang ha pran tui bruă ngă hơkrŭ, plơi pla arăng phă pơrai amăng rơnuk blan wang. Plơi pla ră anai hơmâo 307 boh sang anŏ hăng giăm 1.300 čô mơnuih, lu hloh lĕ neh met wa djuai ania Êđê. Mơng kual lŏn hơmâo lu tơlơi rơngiă, ƀuôn Cháy ră anai jai hơmâo lu tui jơlan prong rơhaih, lu sang anŏ pơđĭ kyar bruă pla kơphê, ƀơƀrư̆ đĭ tui prăk pơhrui.

Jing mơnuih pơlir hăng kual ngă hơkrŭ đưm hlâo adih, tha plơi Y Yơng ăt ƀuh tơlơi pơplih mơng plơi pla tơdơi kơ hrơi lŏn ia ta pơlir jing sa. Găn rơgao lu anih ngă bruă, tha plơi Y Yơng lêng kơ pơtă neh met wa tŏ tui gru grua gum pơgôp, laih dong đing nao ƀiă tơlơi hơdip phrâo ră anai. “Pơtrut pơsur neh met wa ngă tui hơdôm tơlơi črâo trun mơng Ping gah hăng Kơnuk kơna. Kar hăng hrơi anai kâo nao pơblang brơi neh met wa kiăng huăi ngă tui hơdôm tơlơi sat, pơhlôm tơlơi hơdip hiam klă. Mơng pơmut hrŏm, kâo hyu pơblang brơi, sit biă ñu lĕ ƀing čơđai, brơi ƀing gơñu ngă tui djơ̆ tơlơi črâo trun mơng Ping gah hăng tơlơi phiăn mơng Kơnuk kơna”.

Să Ea M’Droh ră anai hơmâo akŏ pơjing hluai tui bruă pơmut hrŏm tlâo boh să Ea M”Droh, Ea Mnang hăng Quảng Hiệp. Amăng 2 thun rơgao, hluai tui Jơlan hơdră hơnong pơkă dêh čar amăng pơhrŏ trun ƀun rin hơđong kjăp, să hơmâo djru brơi 76 drơi rơmô ania kơ 38 boh sang anŏ. Đơ đam să hơmâo pơhrŏ trun 55 boh sang anŏ ƀun run, amăng anun hơmâo 44 boh sang anŏ djuai ania ƀiă. Tui ơi Trần Doãn Tới, Khua git gai Ping gah să Ea M’Droh, hơdôm hơdră bruă mơng Kơnuk kơna hơmâo pok pơhai tui tơlơi kiăng mơng rĭm boh sang anŏ. Hrŏm hăng gong gai hăng khul grup, tha plơi, khua plơi, mơnuih arăng đăo gơnang amăng plơi pla gơgrong amăng bruă pơblang brơi hơdôm tơlơi tơnap tap amăng ƀon lan; pơtô pơblang, hơmâo tơlơi mut hrŏm mơng mơnuih ƀôn sang. “Tha plơi hơmâo ngă tui pran ngă hơkrŭ, tŏ tui jing tơngan tô glông tui mơng Ping gah hăng gong gai ƀon lan, hơmâo hơdôm tơlơi pơgôp prong amăng bruă ba tơlơi pơtrun, hơdră bruă mơng Ping gah mut amăng tơlơi hơdip hluai tui hơdôm mông jơnum amăng plơi pla, pơtô glăi ană tơčô thâo. Pơgôp amăng bruă pơjing anih anom kơđi čar amăng plơi pla, pơđĭ kyar bơwih ƀong huă mơnuih mơnam hăng sit biă ñu lĕ bruă djă pioh hăng tŏ tui gru grua mơng plơi pla. Anai lĕ ƀing ba gru kiăng rơnuk hlăk ai kah hăng neh met wa amăng plơi pla hrăm tui”.

Ƀu djơ̆ kơnong hăng boh pơhiăp, ƀing tha plơi, mơnuih arăng đăo gơnang amăng hơdôm boh plơi pla ƀơi Dak Lak ăt pơlir bruă pơtrut pơsur ană plơi pla pơđĭ kyar bơwih ƀong huă, pơplih tơlơi hơdip. Ƀơi plơi Phước Tân, să Tây Sơn, ơi La O Lanh, djuai ania Čăm, ră anai 74 thun laih, ăt gir run amăng bruă bơwih ƀong hăng mut hrŏm bruă amăng plơi pla. Ñu pơtrut pơsur neh met wa tŏ tui pran gum pơgôp, pơsir hĭ hơdôm bruă bơrơjah bơrơsao amăng plơi pla, laih dong gir run bơwih ƀong huă, mă yua boh thâo phrâo hăng yua lŏn mơnai klă. Ơi La O Lanh brơi thâo, čang rơmang neh met wa đăo gơnang hăng ngă tui, ñu pô ăt ba jơlan hlâo, pơhiăp dưi hăng ngă dưi. “Jing mơnuih arăng đăo gơnang kiăng ba gru, ba jơlan hlâo amăng plơi pla. Kâo mah tha rơma laih samơ̆ ăt mut hrŏm bruă bơwih ƀong huă kiăng pơtrut pơsur neh met wa pơhrŏ trun ƀun rin, gir run pơtrut pơsur, pơtô pơblang kiăng neh met wa ngă tui, gum hrŏm pơklaih mơng ƀun rin hơđong kjăp.”

Dak Lak ră anai hơmâo 1.546 boh plơi pla hăng 1.069 čô mơnuih arăng đăo gơnang amăng plơi pla. Hăng pran pơlir hơbit, thâo hluh hăng hơmâo tơlơi glăm ba hăng plơi pla, ƀing pô anai tŏ tui ngă gong jơlan tô nao rai kơplah wah gong gai hăng mơnuih ƀôn sang, djru brơi hơbô̆ bruă gong gai ƀon lan 2 gưl tañ ngă bruă brơi tŭ yua, klă hloh.

Ơi Lương Nguyễn Minh Triết, Khua git gai Ping gah tơring čar Dak Lak pơsit tong, amăng rơwang pơđĭ kyar phrâo, tha plơi, khua plơi, mơnuih arăng đăo gơnang amăng plơi pla lĕ ƀing mơnuih ngă akŏ amăng hơkrŭ pran gum pơgôp djop djuai ania. “Ƀing mơnuih arăng đăo gơnang amăng plơi pla, tha plơi, khua plơi lĕ ƀing mơnuih jê̆ giăm mơnuih ƀôn sang hloh, thâo hluh rơđah hloh kah hăng hơmâo boh pơhiăp kiăng pơsur pran jua mơnuih ƀôn sang. Tơring čar čang rơmang ƀing pô anai ăt tŏ tui pran gơgrong ba jơlan hlâo, thâo tong ten tơlơi sit nik amăng ƀon lan. Jing anih gơnang nao kơplah wah gưl Ping gah, gong gai hăng mơnuih ƀôn sang kiăng pơsur mơnuih ƀôn sang ngă tui djơ̆ tơlơi črâo trun mơng Ping gah, hơdră bruă, tơlơi phiăn mơng Kơnuk kơna, laih dong lăi pơthâo tong ten boh pơhiăp hăng tơlơi čang rơmang mơng mơnuih ƀôn sang hăng Ping gah laih dong gong gai djop gưl.”

Tơlơi pơtrun mrô 307 mơng Kơnuk kơna, dưi ngă tui dong mơng blan 9 thun anai, tŏ ngă tui tong ten hơdră djru brơi mơnuih arăng đăo gơnang amăng kual mơnuih djuai ania ƀiă, sit biă ñu lĕ bruă lăi pơthâo tơlơi pơhing, pơtô hrăm kơ boh thâo amăng pơtrut pơsur mơnuih ƀôn sang. Anai le atur phun kiăng djop ƀon lan tŏ tui tơlơi đing nao, tŏ tui tơlơi gơgrong mơng mơnuih arăng đăo gơnang, djru brơi ƀing gơñu hơmâo tơlơi gal gum hrŏm neh met wa amăng pơđĭ kyar bơwih ƀong huă, pơhrŏ trun ƀun rin hăng pơjng tơlơi hơdip amăng plơi pla jai hrơi klă ƀiă./.