Jơnum min mơnuih ƀon sang tơring čar Lâm Đồng git gai hơdôm gơnong bruă, gong gai 124 boh să phường, kual wai lăng hơjăn Phú Qúy krăp lăng tơlơi pơhing, pơhŭi hlâo tơlơi truh; pôr pơthâo tañ kơ mơnuih ƀon sang kiăng thâo pơgang hlâo, pơhlom rơnuk rơnua ană mơnuih hăng dram gơnam. Khul tơhan pơƀut sem lăng djŏp kual plơi pla ter hang ia rơsĭ, ƀơi ia krông, čroh hnoh, gah dơnung plung, hăng anih amuñ ia dăo, lŏn tơhlŏm. Khul pơgang tơlơi truh kơ mơnuih ƀon sang tơring čar dŏ gak tơhrơi hăng mlăm, čơkă hmư̆ tơlơi truh hơjan kơthel ngă tui Mrô telephôn 112; prăp lui djŏp khul tơhan, rơdêh, măi mok, gơnam yua tui tơlơi pơtrun “4 ƀơi anih”, prăp rơmet djru mơnuih bưp tơlơi truh sat.

Ƀơi anăp kơ adai hơjan hlim či truh, Jơnum min mơnuih ƀôn sang tơring čar Dak Lak ăt hơmâo pok pơhai lu hơdră pơhlom, pơgang tơlơi truh kơthel hơjan hlim, ia ling dăo hăng lơ̆n tơhlŏm ngă. Tơring čar pơtrun hiăp djop să, plơi pla hyu ĕp lăng tong ten, ƀơi djop anih, plơi pla jĕ giăm hang ia krông, ia čroh hnoh, kual plung dơnung, anih juăt hơmâo lơ̆n mơ̆ng čư̆ tơhlŏm trun, pioh pơđuăi hĭ mơnuih ƀôn sang mơ̆ng anih hŭi rơhyưt. Khul ling tơhan, kông an prăp lui laih mơnuih či mă bruă, rơdêh đĭ, gơnam yua nao djru pơklaih mơnuih mông ječ ameč truh; nao pơgăn jơlan rô nao rai ƀơi tơdrông tua ia blai, ia lơ̆i kơtang, ƀu brơi rơdêh, mơnuih ƀôn sang găn rơgao nao rai ƀơi anih hŭi rơhyưt sit ia ling dăo prong.

Khua mua tơring čar Dak Lak pơtrun hiăp brơi abih bang pô wai lăng dơnao pơkong ia, sang măi drai apui lơtrik ngă tui djơ̆ tơlơi pơtrun pok pơhai ia amăng mông ia lip kơtang, pơgang mơnuih ƀôn sang dŏ pơ kual gah tơkai ia rơnuk rơnua hăng pơgang bơnư̆ pơkong ia huăi răm ƀăm. Gong gai plơi pla gưl să hăng djop sang bruă pơdjơ̆ hrŏm khom prăp lui mơnong ƀong huă, ia mơñum hăng prăk kăk pioh djru mơnuih ƀôn sang amăng mông pơdŭ đuăi mơ̆ng anih hŭi rơhyưt, ječ ameč truh.