VOV4.Jarai-Lơ1/6, ƀing khua mua pơ ala mơnuih ƀôn sang dêh čar jơnum abih bang ƀơi sang rung, pơčrông sai hăng pơtong glăi pơhrua nao dơ̆ng boh tơhnal ngă tui akŏ bruă pơđĭ kyar bơwih ƀong huă mơnuih mơnam hăng prăk kăk kơnuk kơna. Ƀing khua mua pơ ala bơni hơdôm boh tơhnal klă hiam amăng bruă pơhlôm pơgang klin Covid 19 rơgao. Mah hnun, lu khua mua pơdah pran jua bơngơ̆t mơ̆n lơ̆m rơnoh prăk čan aka ƀu dưi mă čan. Laih dơ̆ng, rơkâo kơnuk kơna đing nao biă mă kơ rơnoh ia săng đĭ đơi hăng nua mơnong ƀong huă hnun mơ̆n.

Ƀơi anăp lĕ, khom ngă hơđong tơlơi bơwih ƀong huă kơ dêh čar, ĕp lăng prăk trun nua, pơgang tơlơi hơđong mơnuih ƀôn sang. Ƀing khua mua pơdah thâo lu hơdră pơtrut pơđĭ kyar bơwih ƀong huă thun blan pơ anăp kiăng dưi ngă djơ̆ boh tơhnal pơtrun pơđĭ kyar ƀơi dêh čar mơ̆ng 6-6,5%, pơgăn prăk trun nua 4% thun anai. Amăng anun, rơkâo kơnuk kơna  pơkra hơdră sa hnong, mơ̆ng ƀiă hrơi blan truh sui thun, bong glăi hơđong hăng tơlơi ječ ameč tơdah hơmâo; biă mă ñu kiăng gleng nao kơ bruă ngă hmua, sa gơnong bruă djă gơgrong phun amăng mông lŏn ia hlăk bưp tơlơi tơnap tap.

Nay Jek: Pơblang