Amăng mông mă bruă, ƀing pơ ala hơdôm gơnong bruă, anom bruă, sang bruă tơring čar Dak Lak lăi pơthâo hơdôm tơlơi tơnap tap hăng rơkâo gơnong glông sem lăng, pơsir hĭ kiăng pơđĭ kyar bơwih ƀong huă, mơnuih mơnam amăng tơring čar pơ anăp. Rơkâo đĭ hơdôm tơlơi ngă gun amăng pơđĭ kyar tuai čuă ngui amăng tơring čar, ơi Lại Đức Đại, kơ-iăng khua gơnong bruă gru grua-bơrơguăt drơi jăn hăng tuai čuă ngui tơring čar Dak Lak brơi thâo, hơdôm boh tơring čar kual Dap kơdư, amăng anun hơmâo tơring čar Dak Lak hơmâo lu tơlơi gal amăng pơđĭ kyar tuai čuă ngui amăng plơi pla, tuai čuă ngui pơ đang hmua-plơi pla. Samơ̆ ră anai aka ƀu hơmâo tơlơi pơkă tong ten kơ tơhnal pơplih lŏn ngă hmua hơdai nao lŏn pioh bơwih bơwang yua anun hơdôm anom bơwih ƀong sĭ mơdrô ƀu khin tuh pơ alin kơtang amăng bruă anai.

Amăng mông mă bruă, ƀing khua mua ăt rơkâo hơdôm boh tơhnal bơdjơ̆ nao hơdôm bruă: ngă hmua, hơdang pơtâo, hrăm pơhlôm nua mơnuih mơnam, phaih phiăn, apui lơtrik….Ƀing Khua pơ ala mơnuih ƀôn sang tơring čar Dak Lak tŭ mă hơdôm tơlơi pơgôp hiăp, rơkâo ƀing khua mua, pơƀut glăi, kah pơpha kiăng mơ-it nao Ƀirô Khua pơ ala mơnuih ƀôn sang dêh čar hăng djop gơnong bruă sem lăng.