VOV4.Jarai-Ăt amăng hơdră mă bruă jơnum lok 3, mơguah lơ 30/5, bơkơtuai ƀơi sang jơnum prong kơ bruă ngă tui jơlan hơdră, tơlơi phiăn kơnuk kơna pơkă hnong yap mơ̆ng Tơlơi phiăn pơkă hnong man pơdong dưi ngă tui, ƀing pơ ala hơmâo pơčrâo rơđah hơdôm bruă mă aka ƀu djơ̆ laih anun jŭ yap glăi bruă pơkă hnong, ba truh dŏ 104 mơta bruă pơkă hnong aka ƀu pơsit, kĭ kơđom, ngă bơbeč djơ̆ tơlơi bơwih ƀong huă mơnuih mơnam.

Tui hăng ƀing pơ ala, Tơlơi phiăn man pơdong pơkă, ling rek pơkă hnong man pơdong khom lăi pơthâo rơđah amăng plang internet điện tử sang bruă pơkă hnong. Samơ̆ bruă ngă pôr pơthâo tơlơi pơhing pơkă hnong ngă tŭ kơ hơmâo, boh nik ñu pơkă hning man pơdong, pơkă guai lŏn, ling dŏ plơi. Lu tơlơi pơgôp hiăp, rơkâo đĭ khua mua pơ ala mơnuih ƀôn sang ngă hră pơtrun jao bruă krăo lăng ngă tui jơlan hơdră, tơlơi phiăn kơnuk kơna amăng bruă pơkă hnong hăng hơdôm bruă pơsir hĭ tơlơi tơnap tap, gun gan kiăng pơtrut ngă tui tŭ yua hăng pơkă hnong tañ bruă man pơdong amăng plơi prong phun.

Laih dơ̆ng, rơkâo sit pơkă hnong khom lăng nao tơlơi gêh găl sit nik amăng tơlơi hơdip, anih dŏ, pơtong lăng tong ten tơlơi gêh găl, hnong pơhno nao rai rĭm ding jum, anom bruă, tơring čar, pơbuă tui tơlơi pơtrun, hơdră bơtơhmal rơđah rơđong kơ rĭm bruă, rĭm mơnuih ƀudah ƀu pôr pơthâo ôh tơlơi pơhing pơkă hnong.

Nay Jek: Pơblang