Jơnum anai sem glăi pơtum nao, pơsir bruă dŏ glăi kiăng ngă giong hĭ amăng thun 2024; laih dơ̆ng pơsit bruă mă hăng hơdră pơtom hiăp mơ̆ng Jơnum min apăn bruă phun pơ ala mơnuih ƀôn sang dêh čar thun 2025 hăng sem glăi, pơsit lu boh yom phun pơkŏn tui hăng tơlơi dưi. Pơhiăp pok jơnum, Khua git gai pơ ala mơnuih ƀôn sang dêh čar ơi Trần Thanh Mẫn brơi thâo, amăng dua hrơi jơnum, Jơnum min apăn bruă phun pơ ala mơnuih ƀôn sang dêh čar pơtum sem glăi, bruă pơƀut, pơtong glăi bruă mă jơnum lok 8, khua mua pơ ala tal 15 laih anun pơtong glăi bruă mă čih pơkra tơlơi phiăn dêh čar, kơnang kơ hơdră mă bruă mơ̆ng Jơnum min apăn bruă phun pơ ala mơnuih ƀôn sang dêh čar amăng thun 2025, pơgôp hiăp tal blung a kơ  bruă prăp lui jơnum lok 9 mơ̆ng ƀing pơ ala mơnuih ƀôn sang dêh čar.

Tui hăng anun, him lăng, ƀing pơ ala mơnuih ƀôn sang amra jơnum ječ ameč amăng rơnuč blan 2 thun 2025 kiăng čih pơkra pơhrua nao dơ̆ng tơlơi phiăn pơdjơ̆ nao Tơlơi phiăn pơphun anom bruă khua pơ ala mơnuih ƀôn sang dêh čar, tơlơi phiăn pơphun bruă Kơnuk kơna dêh čar, tơlơi phiăn pơphun bruă gong gai kơnuk kơna djop tơring čar. Jơnum min apăn bruă phun pơ ala mơnuih ƀôn sang dêh čar amra pơgôp hiăp kơ 7 boh yom phun kơ prăk kăk, ngăn drăp kơnuk kơna. Khua git gai pơ ala mơnuih ƀôn sang dêh čar ơi Trần Thanh Mẫn pơtrun hiăp brơi tañ ngă pơgiong hĭ hơdră, kơčăo bruă, čih pơkra glăi hơdôm tơlơi phiăn kiăng hmao hăng anŏ pơblih phrâo lŏn ia, dăp glăi bruă mă kơnuk kơna hơbôt hloh, mă bruă beč bal hmar tŭ yua hloh.