Tui lăi pơthâo mơng Jơnum min plĕ hră ruah khua mua tơring čar Dak Lak, truh ră anai, bruă prap lui plĕ hră amăng tơring čar ba glăi boh tŭ yua. Khul git gai plĕ hră ruah khua mua tơring čar pơphun jơnum tal pă, ba tơbiă hơdôm tơlơi lăi pơthâo klah čun kiăng git gai na nao. Jơnum min pơ ala mơnuih ƀôn sang tơring čar akŏ pơjing 11 grup krăo lăng, pơphun plĕ ĕp ƀơi 102 boh să, phường kiăng hmao tlôn thâo tơlơi sit nik hăng pơsir hĭ tơnap tap ƀơi ƀon lan. Gơnong bruă wai lăng bruă mă pơtop hrăm brơi rơbêh 15.000 čô mơnuih ƀơi 103 anih pơlăng nao rai mơng ataih, đing nao bruă pơhlôm bơtŭ ư hrŏm, čih anăn mơnuih ƀôn sang ruah khua, bruă jŭ yap hră plĕ.

Jơnum pơčrông sai tal dua gưl tơring čar bơrŭ ư hrŏm ƀing pô tơbiă anăn jang jai lĕ 22 čô Khua pơ ala mơnuih ƀôn sang hăng 144 čô khua mua Jơnum min pơ ala mơnuih ƀôn sang tơring čar, gưl să tŭ mă rơbêh 4.600 hră pơ-ar, hơmâo mơnuih tơbiă anăn mă pô. Mơng lơ 4-8/2 pơphun mă tơlơi pơgôp hiăp mơng mơnuih ƀôn sang ruah khua ƀơi ƀon lan; jơnum pơčrông sai tal tlâo pơgiong hlâo kơ tết.