Sa mơta boh yôm phun amăng tal tơña anai hơmâo: Hơdră ngă pơgiong jơlan glông, hnong pơdŭ pơgiăng, kiăng plai ƀiă tơlơi truh pơjrom rơdêh amăng dêh čar; tơlơi glăm ba mơ̆ng kơnuk kơna jao amăng bruă sem lăng anŏ kjăp; git gai wai lăng bruă mă pơdŭ pơgiăng, boh tŭ yua kjăp rơdêh ôtô, bruă pơtô pơhrăm, pơgăt rơdêh. Hăng pran jua hmư̆ laih anun ngă tui, glăm ba, Khua ding jum Jơlan glông pơdŭ pơgiăng ơi Nguyễn Văn Thắng đing hmư̆ djop tơlơi pơgôp hiăp kiăng ngă tui tŭ yua jơlan hơdră, bruă pơtrun mơ̆ng Ping gah, kơnuk kơna amăng bruă pơđĭ kyar pơkra jơlan glông hăng pơdŭ pơgiăng, kiăng tañ ngă giong bruă čuk pơkra jơlan glông phrâo hiam, mơnuih ƀôn sang rô nao rai rơnuk rơnua mơak klă hloh.

Khă hnun, anom bruă anai dŏ lu tơlơi kơƀah, tơdu kiăng pơsir khut khăt kah hăng tơlơi truh rơdêh pơjrom, tơlơi soh glăi amăng bruă ĕp anŏ kjăp rơdêh, bruă pơtô hrăm mơgăt rơdêh, ngă brơi hră, wai lăng hăng mă glăi hră mơgăt rơdêh....Khua ding jum brơi thâo, hơdôm tơlơi pơgôp hiăp mơ̆ng ƀing pơ ala mơnuih ƀôn sang dêh čar jing sa pran kơtang pioh kơ Ding jum kơtưn gir hloh ngă giong bruă ngă, tơlơi glăm ba prong yua Ping gah, kơnuk kơna, mơnuih ƀôn sang jao brơi.