Amăng thun 2024, Binh đoàn 15 hơmâo lu tơlơi dưi yôm phăn. Anom bruă hơmâo pok pơhai ngă hơdôm ring bruă wai pơgang phrâo, tŏ tui bruă jao prap blah ngă hăng ngă tui tŭ yua hơdôm hơdră bruă wai pơgang rơnuk rơnua ƀơi kual giăm guai hrŏm hăng hơdôm boh ƀon lan. Laih dong, hơdôm anom bruă mơng Binh đoàn hơmâo dưm truă camera ƀơi hơdôm kual phun, pơgôp yôm phăn amăng bruă wai lăng hơđong ƀơi kual giăm guai kơplah wah Việt Nam-Kur.

Amăng mông bưp, Đại tá Phan Xuân Hòa-Khua git gai Ping gah hơđăp, Kơ-iăng Khua kông ti 715 (gah Binh đoàn 15)- pơdah tơlơi hok mơ-ak ƀơi anăp tơlơi dưi mơ̆ Binh đoàn dưi ngă. Binh đoàn ƀu djơ̆ kơnong pơkra pơjing gơnam kiăng yua đôč ôh mơ̆ ăt kah mă kiăng man pơkra hơdôm ring bruă amăng ƀon lan pơdong puih tơhan, djru pơplih tơlơi hơdip mơng mơnuih ƀôn sang. Pơ anăp anai, Binh đoàn amra tŏ tui gru grua hiam klă, pơjing anih anom jai hrơi pơđĭ kyar.