VOV4.Jarai - Amăng blan hlăk ai, Khul hlăk ai Kông ti Apui lơtrik Dak Lăk hơmâo pơphun ngă lu bruă klă, yôm. Rơđah biă ñu, anom bruă hơmâo brơi gơnam kơ 6 čô čơđai sang hră rin găn rơgao tơnap tap ƀơi să Bình Hòa, tơring glông Krông Ana, rim anung gơnam hơmâo nua 2 klăk prăk; pơphun ngă ring bruă “Tŭi rơđah jơlan amăng plơi” ƀơi plơi Giang Xuân, să Ea Dah, tơring glông Krông Năng, glông 1km hrĕ dăng apui, hăng 19 boh apui kơđen hơmâo tŭ rơđah amăng plơi pla, nua pơkra ñu rơbêh 30 klăk prăk.

Hlăk ai PC Dak Lăk brơi gơnam kơ čơđai sang hră rin găn rơgao tơnap tap.

Ăt amăng blan hlăk ai mơn, anom bruă hơmâo ngă ring bruă “Tŭi rơđah jơlan amăng plơi” nua 50 klăk prăk, pơkra brơi rơbêh 1km hrĕ apui lơtrik hơmâo 22 boh apui tŭi rơđah ƀơi hơdôm glông jơlan amăng plơi Sut M’drang, să Čư̆ Suê, tơring glông Čư̆ M’gar. Hrŏm hăng bruă djru ba mơnuih ƀon sang, hlăk ai PC Dak Lăk hơmâo hyu pel ĕp lăng măi mok ƀơi glông hrĕ apui jua găp ƀrô, jua tơdu, jua đĭ trun ƀơi guai lŏn ia tơring glông Ea Súp.

Siu H’Mai: Pơblang