VOV4.Jarai - Blan hlăk ai thun 2022 hmâo anăn ñu “Hlăk ai pơčeh phrâo”. Hrom hăng đơ đam dêh čar, hlăk ai ƀơi Dăp Kơdư glăk hmâo lu bruă mă sit nik, anăp nao plơi pla.

“Blan hlăk ai” thun anai dưi hmâo Khul hlăk ai tơring čar Daklak pơphun ngă lơphet pok phun ƀơi să Drai Bhăng, tơring glông Čư̆ Kuiñ. Ƀơi mông ngă lơphet, Khul hlăk ai tơring čar Daklak hmâo jao laih ring bruă Ngă bơngač jơlan plơi pla ƀơi să Ea Tiêu hăng ring bruă “Jơlan pơčrang rơđah 3 klă” ƀơi Sang hră gưl 3 Y Jut. Pơsir brơi 150 klăk prăk pioh pơsir bruă mă kơ hlăk ai tơring glông Čư̆ Kuiñ. Ƀơk sa bôh sang khăp păp hăng ƀơk 40 anung gơnam tam (rim anung gơnam nua ñu 300 rơbâo prăk), 20 bôh rơdêh dang wang brơi hơdôm bôh sang anô̆ tơnap tap hăng čơđai yak rơgao tơlơi tơnap hrăm hră rơgơi. Khul hlăk ai tơring glông Čư̆ Kuiñ ăt jao mơn sa sang dô̆ khăp păp kơ sang anô̆ ƀun rin, sa hơdră lan ngui ngor kơ čơđai muai hăng pơphun pơdŏng sa tơdron pah bôh lông.

Amai H’ Giang Niê, Khua git gai Khul hlăk ai tơring čar Daklak brơi thâo, hăng bôh than pơjing pran bơkơtưn hur har, čơkă mơ-ak hơdôm bruă jơnum kơđi čar prong amăng sa thun, amăng tơlơi bơdjơ̆ nao yua kơ klin ruă, hlăk ai Daklak hmâo ba tơbiă hơdôm tơhnal pơkă rơđah nao hrom hăng bôh nik tơlơi kiăng ƀơi plơi pla, pơplih tañ pok pơhai hơdôm bruă mă kiăng ngă giong tơhnal pơkă ba tơbiă hăng pơhlôm pơgang pơgăn klin.

“Akô̆ mơng blan hlăk ai thun anai lĕ “Hlăk ai pơčeh phrâo: phun than pơčeh phrâo amra hmâo lu tơhnal, amăng anun hmâo bruă pơčeh phrâo amăng pơphun hơdôm bruă mă, biă ñu tơlơi pơčeh phrâo amăng bruă ngă juăt pơplih tañ hăng klin ruă hăng pơphun truh kih jơnum khul rơwang bruă 2022-2027. Hăng hơdôm gưl khul hlăk ai khom gum hrom hơbit, ha pran jua iâu pơhrui hơdôm ngăn rơnoh kiăng djru pơphun bruă khul ăt kah hăng mơnuih amăng hluh tơdăm ngek dra muai amăng đơ đam tơring čar hăng pran pơsit prong hloh dong amăng ngă bruă ngă tui truh kih 11 tơhnal pơkă mơng blan hlăk ai hăng hơdôm tơhnal pơkă mơng thun 2022”.

Jao hră kak hlăk ai hăng miđai hlăk ai kơ mơnuih phrâo mut khul ƀơi Kontum

Amăng “Blan hlăk ai”, hlăk ai tơring čar Daklak hrưn đĭ pơkra giong 5km jơlan Pơčrang rơđah jơlan amăng plơi pla; pel ĕp, pơpha jrao brơi kơ 2000 wot čô mơnuih ƀôn sang; pok pơhai ƀiă biă mă ñu 10 anih anom jơnum, hơdră tơdron ngui ngor kơ čơđai muai ƀơi hơdôm bôh să tơnap tap; pơdŏng 5 bôh sang hơdor tơngiă, sang khăp păp, sang khăn quàng đỏ. Gum hrom dong hăng hlăk ai pơdŏng pô, pơdŏng bruă mă, pơsur pơdŏng mơng 1-2 bôh anom mă bruă hrom, grup gum hrom hlăk ai; djru hơdôm rơwang bruă pơphun bruă mă mơng hlăk ai amăng tơring čar.

Ƀơi tơring kual Plây Kần, tơring glông Ngọc Hồi, Khul hlăk ai tơring čar Kontum ăt pơphun mơn mông ngă Lơphet Blan hlăk ai hăng Jơlan hơdră “Blan 3 guai lŏn ia – Guai lŏn ia kâo”. Amăng mông pơphun ngă Lơphet mơtăm, Khul hlăk ai tơring čar Kontum hmâo ƀơk brơi laih 20 anung pioh bơwih ƀong kơ sang anô̆ mơnuih apăn bruă tơhan, ling tơhan glăk dô̆ mă bruă ƀơi guai lŏn ia hăng hlăk ai hmâo tơlơi hơdip tơnap; ƀơk hră Kak khul hlăk ai hăng Miđai khul kơ 50 čô mơnuih hlăk ai phrâo mut; lăi pơthâo 20 čô mơnuih hlăk ai mơbruă kơ gưl ping gah pel ĕp pơhrăm brơi dong mơnuih mut khul...

Tal anai Khul hlăk ai hăng Khul đah kơmơi Ding jum kông ang hmâo ƀơk laih 10 hơdră pơđĭ kyar bơwih ƀong hmâo 1.000 drơi mơnŭ pioh djuai mă bôh brơi 10 bôh sang anô̆ gah hơdră bruă, sang anô̆ hmâo tơlơi hơdip tơnap tap, ƀing apăn bruă khul đăo amăng djuai ania ƀiă, khul đăo. Ƀơk 3 bôh măi kompiutơr, 200 anung gơnam (hră čih, gai čih) hăng man pơdŏng ring bruă “Ia hơdjă yua kơ čơđai” ƀơi Sang hră gưl sa să Pơ̆ Y, tơring glông Ngọc Hồi, tơring čar Kontum. Ƀơk brơi 6 per măi kompiutơr, 200 anung gơnam (hră čih, gai čih) kơ 2 anih anom sang hră ƀơi Phu Cưa hăng ƀơk 16 per măi kompiutơr kơ 8 bôh anom mă bruă Kông ang plơi gah tơring čar Attapư, dêh čar Lao.

Ƀơi Gialai, “Blan hlăk ai” thun anai dưi hmâo Khul hlăk ai tơring čar Gialai pơphun ƀơi să Ia Trôk, tơring glông Ia Pa. Ƀơi mông ngă lơphet pok phun, Khul hlăk ai tơring čar Gialai hmâo 135 anung gơnam brơi kơ ƀing čơđai sang hră; Ƀơk 1 hơdră “Anih pơđok hơdrôm hră, lăi pơthâo nao rai hăng jơnum Grŭp” hmâo nua 50 klăk prăk; ƀơk kơƀang bơhmu mă 2 bôh sang “Khăn quàng đỏ” kơ 2 čô čơđai hmâo tơlơi hơdip tơnap. Rơngiao kơ anun, anom ăt hmâo pơphun mơn hơdôm jơlan hơdră ngă bruă yua kơ plơi pla kah hăng: Brơi rơbêh kơ 400 anung drah gum djru, djru hrơi bruă, pơplih pơkra jơlan nao rai amăng anăp plơi, pơdŏng sang hơdor tơngia. Ayong Đỗ Duy Nam, Kơ-iăng Khua git gai Khul hlăk ai tơring čar Gialai brơi thâo, hơdôm bruă mă Blan hlăk ai thun 2022 dưi pok pơhai dơlăm mơng plơi pla, pơdah pran jua pơsit mơng hlăk ai, pơhlôm hơdôm črăn bruă ba glăi bôh tơhnal prong.

“Grŭp păn bruă Khul hlăk ai tơring čar ăt hmâo laih hơdră pơtrun hơdôm bruă mă, hơdôm jơlan hơdră, črăn bruă hmâo črâo ba laih kơ plơi pla tui hluai kơ bruă mă, tui hluai kơ ring bruă črăn bruă mơ̆ pơhlôm gah mrô mơnuih, gơgrong hlâo amăng bruă pơkiăo nao mơnuih apăn bruă hlăk ai gum hrom. Ngă hiưm hơpă ring bruă anun pơhlôm rah rơnoh bruă hăng anô̆ klă ñu dong, biă ñu hơdôm bruă lăi pơhing cơkă mơ-ak blan hlăk ai hăng biă ñu lĕ čơkă mơ-ak Jơnum Khul hlăk ai hơdôm gưl”.

Hăng anăn ñu “Hlăk ai pơčeh phrâo”, “Blan hlăk ai” thun anai hmâo Khul hlăk ia rơnuk Hồ Chí Minh dêh čar ta pơphun ngă lơphet pok phun ƀơi plơi prong jưh jom Hà Nội. Ƀơi anai glăk pơphun pơdă prưng pơčeh phrâo “Hlăk ai thâo hră”; pơphun pơdŏng sa dua ring bruă, kah hăng Sang khăn quàng đỏ hăng ƀơk brơi kơ čơđai sang hră tơnap tap; lăi pơthâo 16 khul Pơplih phrâo pơčeh phrâo... Ăt amăng Blan hlăk ai thun anai mơn, Khul hlăk ai rơnuk Hồ Chí Minh dêh čar ta amra pơphun jơlan hơdră “Bơkơtuai kơplah wah Khua git gai tal sa Khul hlăk ai dêh čar ta hăng khul khul hlăk ai, tơdăm dra; jơlan hơdră “Blan tlâo guai dêh čar”; ƀơk pri kơ 10 gru ba jơlan hlâo hlăk ai Việt Nam mơbruă thun 2021 hăng jơlan hơdră Hơdor glăi 91 thun Hrơi pơdŏng Khul hlăk ai rơnuk Hồ Chí Minh, ƀơk pri Lý Tự Trọng thun 2022./.

VOV Tây Nguyên: Čih – Siu H’ Prăk: Pơblang