VOV4.Jarai - Phrâo rơgao, ƀơi Hà Nội, Khul khua apăn bruă git gai Ping gah Việt Nam, Khua mua pơ ala mơnuih ƀon sang dêh čar, Khua mir sir, Kơnuk kơna, Jơnum min djŏp djuai ania mơnuih mơnam Việt Nam hơmâo pơphun kơdrưh biă hrơi ngă lơphet 60 thun Akŏ pơdong tơlơi pơtom hiăp hăng 45 thun hrơi kĭ hră ngă giăng mah hăng ngă hrŏm Việt Nam - Lao.

Hơdor glăi tơlơi ngă giăng mah pŭ ƀăn kơplah wah Ping gah, Kơnuk kơna hăng mơnuih ƀon sang dua boh dêh čar Việt Nam - Lao, Khua git gai Ping gah ơi Nguyễn Phú Trọng lăi rơđah, yŭ tơlơi git gai mơng Ping gah Cộng sản Việt Nam hăng Ping gah Nhân dân Cách mạng Lao, mơnuih ƀon sang dua boh dêh čar gum hrŏm, nao mring mơng hrơi blung a mơtăm, hơmâo lu tơlơi lông lăng, djru pơgang hăng akŏ pơdong Lŏn ia xã hội chủ nghĩa ƀơi rim boh dêh čar. Dua Ping gah, dua boh dê čar djru nao rai rŭ glăi tơlơi bơwih ƀong - mơnuih mơnam tơdơi kơ blah ngă, laih dong amăng ƀrư̆ akŏ pơdong, pơđĭ kyar tơlơi rô nao rai amăng djŏp bruă yôm phun kah hăng bơwih ƀong, gru grua, mơnuih tơpuôl, pơtô pơjuăt, ling tơhan hăng pơtom hiăp nao rai.

Khua git gai Ping gah ơi Nguyễn Phú Trọng pơsit, yŭ kơ apui rơđah bơngač pơčrang jơlan mơng Chủ nghĩa Mác - Lênin, tơlơi pơmin Hồ Chí Minh ƀơi Việt Nam hăng tơlơi pơmin Kay-xỏn Phôm-vi-hản ƀơi Lao, dua Ping gah, dua Kơnuk kơna amra nao hrŏm, gum pơđĭ kyar, pơplih phrâo, dưi hơmâo boh than prong amăng bruă pơđĭ kyar bơwih ƀong huă - mơnuih mơnam, djă bong hơđong rơnuk rơnua kơđi čar, mơnuih mơnam, ba glăi tơlơi hơdip jai hrơi trơi pơđao yâo mơ-ak hăng rơnuk rơnua kơ mơnuih ƀon sang dua boh dêh čar.

“Lăng glăi rơnuk kơdrưh kơ-ang mơng đưm mơ̆ dua djuai ania grum nao hrŏm, ƀing ta dưi pơư pơ-ang kơ tơlơi rô nao rai hiam, ngă gru, abih pran jua mơng dua Ping gah, dua Kơnuk kơna hăng Mơnuih ƀon sang Việt Nam hăng Lao. Tơlơi rô nao rai yôm pơphăn Việt - Lao hơmâo laih ƀing khua prong prin lĕ Khua mir sir Hồ Chí Minh, Khua mir sir Kay-xỏn Phôm-vi-hản hăng Khua mir sir Xu-pha-nu-vông akŏ pơdong ngă atur; abih pran jua akŏ pơdong, djă pioh hăng pơbuă đĭ hăng ia hâ̆o ia hang, tuh drah pơčah asar mơng ling tơhan hăng mơnuih ƀon sang dua bơnah; sit nik jing gơnam yôm ƀu dưi blơi ôh, tơlơi rô nao rai “hơmâo sa ƀu hơmâo dua” amăng gru grua ƀơi rŏng lŏn tơnah”.

Khua git gai Ping gah ơi Nguyễn Phú Trọng pơhiăp ƀơi mông ngă lơphet.

Tui hăng Khua git gai Ping gah ơi Nguyễn Phú Trọng, tơlơi rô nao rai kơplah wah dua Ping gah, dua kơnuk kơna Việt Nam hăng Lao pơđĭ kyar kơjăp tui dong, dlăm tui hăng tŭ yua hloh dong, prong hloh lĕ amăng bruă kơđi čar jai hrơi hơkrŭ kơjăp tui, pơđĭ tui hloh dong, mơng “tơlơi rô nao rai giăng mah pŭ ƀăn” jing “tơlơi rô nao rai prong prin hing ang” mơng blan 2/2019, jai hrơi hơmâo đăo gơnang, pơtô brơi jơlan ngă hrŏm pơkŏn; Ngă hrŏm ling tơhan - rơnuk rơnua jing sa amăng hơdôm gong tơmeh phun yôm hloh amăng tơlơi rô nao rai dua bơnah. Ngă hrŏm bơwih ƀong huă hơmâo lăng ba dong, laih anun hơmâo ngă lu boh than klă, ba glăi tơlơi gêh gal sit nik kơ mơnuih ƀon sang hăng anom bơwih bong dua bơnah; ngă hrŏm pơtô hăng pơjuăt - bruă ngă hrŏm yôm mơng dua boh dêh čar, ăt kah hăng ngă hrŏm gru grua, ia jrao, jơlan nao rai, apui lơtrik jai hrơi hơmâo hơkrŭ tui kơjăp kơtang. Tơlơi rô nao rai mơng hơdôm boh tơring, biă ñu tơring čar giăm guai jai hrơi kơjăp phik.         

Khua git gai Ping gah ơi Nguyễn Phú Trọng ăt lăi mơn, amăng hrơi mông rŏng lŏn tơnah hăng amăng kual glăk pơplih tañ đơi, ƀu thâo hlâo hiư̆m pă; mơnuih mơnam glăk bưp lu tơlơi lông lăng prong kah hăng blah ngă, bơblah amăng dêh čar, tơlơi bơkơtưn kơtang mơng hơdôm boh dêh pơprong, tơlơi rơnuk rơnua ƀu tui đưm kah hăng klin kheng, kơƀah apui yua, mơnong ƀong huă; dua Ping gah, dua Kơnuk kơna hăng mơnuih ƀon sang dua bơnah kiăng gum pơgôp kơjăp hloh, ngă hrŏm hloh dong đah mơng dưi găn rơgao tơnap tap, gir kiăo tui jơlan rơngai djuai ania hăng chủ nghĩa xã hội; gum hrŏm abih pran jua pơgang ba, bơbuă tui tơlơi rô nao rai klă hiam, prong pring, gum pơgôp yôm pơphăn anai laih anun ngă hrŏm abih bang Việt Nam - Lao:

“Ping gah, Kơnuk kơna hăng Mơnuih ƀon sang Việt Nam lêng dong yua kơtang, abih bang bruă pơplih phrâo mơng Lao; laih dong lăng yôm hăng djru brơi hlâo tơlơi rô nao rai ngă gŏp, ngă adơi ayong kơplah wah dua Ping gah, dua kơnuk kơna. Ƀing gơmơi lêng čang rơmang kiăng ngă hrŏm, djru ba dêh čar Lao hăng pran jua “djru gơyut hrup hăng djru glăi ta mơn”, lăng anai jing bruă yôm phun; čang rơmang hrŏm hăng Ping gah, Kơnuk kơna hăng Mơnuih ƀon sang Lao pơbuă tui tơlơi đăo gơnang bruă čar, ngă hrŏm rơnuk rơnua ling tơhan, pơtruh hrŏm tơlơi bơwih ƀong, pơđĭ tui na nao bruă pơtô pơjuăt, gum akŏ pơdong tơlơi bơwih ƀong dưi gơgrong mă pô, mut hrŏm dlăm; gir kiăng hơmâo boh than bruă ngă hrŏm jai hrơi djơ̆ hăng tơlơi hmư̆ hing, kơdrưh kơ-ang mơng tơlơi rô nao rai Việt Nam - Lao”.

Pơhiăp ƀơi mông ngă lơphet, ơi Chít-mạ-ni, Ding kơna Ding jum kơđi čar, Khua mua djru bruă git gai Ping gah Nhân dân Cách mạng Lao, Kơ-iăng khua mir sir dêh čar Lao pơsit, Ping gah, Kơnuk kơna hăng Mơnuih ƀon sang Lao hơdor lui amăng akŏ dlô, drah kơtăk, laih anun bơni biă mă hăng Khua mir sir Hồ Chí Minh prong prin, Khua mir sir Kay-son Phom-vi-hản hăng Khua mir sir Xu-pha-nu-vông khăp ƀu-eng jing mơnuih akŏ pơjing, jing gru rơđah bơngač amăng bruă djă pioh, bơbôr đĭ tơlơi ngă giăng mah prong prin, gum pơgôp yôm pơphăn hăng ngă hrŏm kơplah wah Việt Nam - Lao jing gơnam yôm ƀu dưi blơi ôh, jing tơlơi djơ̆ gal či dŏ dong hăng pơđĭ kyar mơng dua boh dêh čar, jing sa amăng lu tơlơi pơsit brơi tơlơi truh kih mơng bruă hơkrŭ dua boh lŏn ia.

“Ping gah, Kơnuk kơna hăng mơnuih ƀon sang Lao gơmơi lêng gir kiăo tui, lăng anai jing tơlơi gơgrong bruă mơng pô amăng bruă pơtrut tui gru grua rô nao rai prong prin, hing ang, gum pơgôp yôm pơphăn hăng ngă hrŏm abih bang kơplah wah Lao hăng Việt Nam hơmâo găn rơgao lu tơlơi lông lăng, bơbuă tui amăng ƀrư̆ hăng ia hâ̆o ia hang, drah kơtăk mơng ling tơhan sông kơtang ăt kah hăng mơnuih ƀon sang Lao hăng Việt Nam djŏp rơnuk, kiăng djơ̆ hăng tơlơi čih pơtưh ƀu thâo wơr mơng Khua mir sir Kay-sỏn Phôm-vi-hản: “Čư̆ dưi luih, ia dưi thu, samơ̆ pran jua khăp ƀu-eng Lao hăng Việt Nam dŏ na nao, kơjăp hloh kơ čư̆, kơ ia”.

Hăng tui tơlơi čih pơtưh arăng iâu thơ, dŏ djă pioh na nao mơng Khua mir sir Hồ Chí Minh:

“Thâo khăp nao rai hơdôm boh čư̆ ăt dưi yak rơgao

Hơdôm ia krông ăt dưi luai, hơdôm boh čư̆ ăt dưi găn nao

Việt - Lao dua boh dêh čar ƀing ta

Tơlơi khăp dlăm hloh ia krông Hồng Hà - Cửu Long”.

Ơi Bounthong Chitmany, ding kơna ding jum kơđi čar, Kơ-iăng khua mir sir dêh čar Lao đĭ pơhiăp.

VOV 1: Čih - Siu H’Mai: Pơblang