VOV4.Jarai - Hơdră “Pơkĕ hrom sang anô̆ mơnuih mă bruă djuai ania Yuan hăng sang anô̆ neh wa djuai ania ƀiă ƀơi plơi pla” yua kơ Binh đoàn 15 pok pơhai ba glăi laih hơdôm bôh tŭ yua sit nik. Hluai tui hơdră ngă adơi ayong, hơdôm bôh sang anô̆ mơnuih mă bruă djuai ania Yuan hmâo djru laih neh wa djuai ania ƀiă ƀơi Gialai pơplih tơlơi pơmin amăng pơđĭ kyar bơwih ƀong, sut lui rin rơpa, djru kơtưn pran jua gum hrom hơbit abih bang mơnuih ƀôn sang.

Amai Nguyễn Thị Kim Thanh, Grŭp 4, Sang bruă Bình Dương, Binh đoàn 15 lĕ sa amăng hơdôm sang anô̆ ba jơlan hlâo anăp nao bruă “Pơkĕ hrom sang anô̆ mơnuih mă bruă djuai ania Yuan hăng sang anô̆ neh wa djuai ania ƀiă plơi pla”. Amai Thanh čơkă djru ba sang anô̆ amai Kpuih Bler, pô mă bruă hrom hăng sang bruă, ƀơi să Ia Tô, tơring glông Čư̆ Prông, tơring čar Gialai. Hlâo adih sang amai Kpuih Bler lĕ sang anô̆ ƀun rin, lŏn ngă đang hmua hmâo samơ̆ leng kơ lui lơi hong, kơnong kơ pla mă ƀiă kơtor, tơjŭ pơdai. Yua anun khă rơkơi bơnai ñu mă bruă glêh glar kuh thun ăt ƀu djop ƀong, djop huă mơn. Dơng mơng hrơi hmâo tơlơi gum djru, pơtô ba abih pran jua mơng amai Thanh, tơlơi hơdip mơda mơng sang anô̆ ñu pơđĭ kyar hloh laih. Truh ră anai, sang anô̆ amai Kpuih Bler hmâo rơbêh kơ 3 ektar đang phun bôh ñông, kơ phê, pơhrui prăk hơđong. Sang anô̆ ƀu djơ̆ kơnong kơ djop ƀong huă ôh mơ̆ dô̆ rơbêh dong, pơkrem pioh dong. Amai Kpuih Bler – Grŭp 4, Sang bruă Bình Dương, Binh đoàn 15 lăi pơthâo:

“Sit duam ruă thơ ƀing adơi amai rai gum djru, kơđai glăi lĕ sit hlơi duam ruă lĕ kâo nao djru glăi. Lăi hrom ƀing adơi amai hơdip hrom hmâo bruă hơget lĕ djru nao rai tơdruă soh”.

Amai Nguyễn Thị Kim Thanh (ao mơtah) hăng amai Kpuih Bler – Grŭp 4, Sang bruă Bình Dương, Binh đoàn 15 djru hơdră phrâo tơjŭ pla pơlar bruă đang hmua

Bơ̆ hăng amai Nguyễn Thị Kim Thanh – Grŭp 4, Sang bruă Bình Dương, Binh đoàn 15, bruă djru gum amai Kpuih Bler lĕ tơlơi mơ-ak mơng pô. Amai Thanh lăi pơthâo, lơm phrâo nao pơ̆ să Ia Tô pơdŏng tơlơi hơdip sang dô̆, tơlơi hơdip mơng sang anô̆ ñu ăt bưp lu tơlơi tơnap mơn, gơnang kơ tơlơi pơgang ba, gum ba mơng ană plơi, sang anô̆ amai Kpuih Bler ăt lĕ bruă mă hơdor tơngia mơn.

“Pơtô nao rai tơdruă hơdôm bruă mă than, mă tơdŭ, pruih ia hiưm hơpă kiăng pơhlôm, pơtô brơi bruă rông pla añăm pơtăm, hơdjă, ngă bruă bơwih ƀong sang anô̆. Gum nao rai pran jua, ƀu djơ̆ kơnong kơ bruă bơwih ƀong ôh mơ̆, pran jua khăp păp, lơm duam ruă lom bưp tơlơi tơnap, kâo ăt dưi hmâo anih gơnang ƀơi sang anô̆ amai Bler”.

Bruă “Pơkĕ hrom kơplah wah hơdôm bôh sang anô̆ mơnuih mă bruă djuai ania Yuan hăng sang anô̆ mă bruă djuai ania ƀiă” dưi hmâo Binh đoàn 15 pơphun mơng thun 2006. Mơng 30 grôp sang anô̆ blung a, truh ră anai, anom hmâo pơhư prong rơbêh kơ 4.000 grôp sang anô̆, amăng anun hmâo năng ai ñu 2.000 grôp sang anô̆ neh wa djuai ania ƀiă. Bruă pơkĕ hrom sang anô̆ hmâo pơjing rai tơlơi jê̆ giăm biă, thâo hluh nao rai tơdruă hăng amra gum djru nao rai tơdruă hơdôm mông tơnap tap, gum hrom djru nao rai tơdruă pơđĭ kyar bơwih ƀong sang anô̆.

Hơdôm grôp sang anô̆ pơkĕ hrom pơdah kơ bruă pơsur ba glăi bôh tơhnal, sit nik mơng Binh đoàn 15. Mơng anun, pran jua gum hrom hơbit kơplah wah mơnuih mă bruă amăng sa bôh anom; kơplah wah mơnuih mă bruă hăng mơnuih ƀôn sang amăng plơi pla jai hrơi jai kơjăp, jê̆ giăm hloh. Thượng tá Khuất Bá Cao – Khua git gai Ping gah Binh đoàn 15 brơi thâo:

“Hluai tui bruă ngă tui hơdră bruă pơkĕ hrom sang anô̆, amăng hơdôm thun jê̆ hăng anai gum hơgôp yôm phăn biă amăng bruă hơđong hăng pơđĭ kyar mơng anom. Hrom hăng anun, djru hrom hăng gưl ping gah, gong gai plơi pla, hơdôm khul ƀơi plơi pla djă kơjăp tơlơi rơnuk rơnua kơđi čar – hơđong pơhlôm mơnuih mơnam hăng rơnuk rơnua plơi pla, Hơdôm bôh sang anô̆ djuai ania ƀiă ƀu djơ̆ tơtlaih mơng ƀun rin ôh mơ̆, dô̆ hrưn đĭ ngă pơdrong dong, hmâo lu grôp sang anô̆ truh ră anai pơhrui hmâo 200 truh 300 klăk prăk amăng sa thun”.

Bôh tơhnal mơng hơdră “Pơkĕ hrom sang anô̆” djru tơdruă pơđĭ kyar bơwih ƀong mơng Binh đoàn 15 hmâo pơjing laih gru rơđah gah bơwih ƀong, bôh thâo, mơnuih mơnam, pơgang lŏn ia – rơnuk rơnua plơi pla. Mơng anun pơjing tơlơi đăo gơnang, kiăng khăp, ngă kơjăp kơplah wah gưl ping gah, gong gai hăng mơnuih ƀôn sang plơi pla./.

            Hoàng Quy: Čih – Siu H’ Prăk: Pơblang