Anai lĕ gơnam djru sit nik, ngă mơak pran jua tơlơi gum pơgôp djuai ania amăng mơnuih ƀôn sang dêh čar. Lơ 28/8, Khua dêh čar kĭ hră pơtrun Kông điện, brơi djop ding jum, anom bruă, tơring čar tañ pok pơhai, ngă giong hră pơar pơpha prăk kơ mơnuih ƀôn sang hlâo kơ lơ 2/9. Ding jum prăk kăk pơpha prăk, sem lăng kông ngăn prăk kăk kơnuk kơna amăng dêh čar pioh pơpha tum.

Sang bruă prăk kơnuk kơna git gai laih mơ̆n sang bruă prăk sĭ mơdrô brơi prăp lui hơdră tla prăk mơ-it amăng rơnoh mrô ƀudah brơi prăk mơta, ngă gêh găl amuñ ƀiă, či mă prăk, ƀơk brơi kơ mơnuih ƀôn sang. Jơnum min mơnuih ƀôn sang djop tơring čar, ƀôn prong khom gơgrong ba pơphun brơi ngă tui, ƀu lui kơƀah sa čô ôh, ƀudah pơrơkua nao rai ƀơk pơpha dua wơ̆t kơ sa čô. Djop sang bruă pôr tơlơi pơhing khom pôr pơthâo tơlơi anai truh pơ djop mơnuih kiăng mơak hăng tŭ yua kơ bruă hơdor glăi Hrơi rơngai lŏn ia amăng abih bang mơnuih ƀôn sang dêh čar.