VOV4.Jarai - Mơguah lơ 11/2, Ding jum pơtom hiăp dêh čar Việt Nam pơphun Bơkơtuai ASEAN kơ pơhrua hrom bruă Đah kơmơi, Mơ-ak klă hăng Rơnuk rơnua amăng bruă phun Khul ASEAN tui hơdră lăng nao rai mơng ataih. Anai lĕ bruă bơkơtuai yôm phăn tô̆ tui hơdôm tơlơi gir run pơtrut bruă mă Đah kơmơi, Mơ-ak klă hăng Rơnuk rơnua (WPS) amăng ASEAN mơng Việt Nam mơng rơwang bruă Khua Khul ASEAN thun 2020. Pơhiăp amăng mông pok phun bơkơtuai, Kơ-iăng Khua ding jum pơtom hiăp dêh čar ta ơi Nguyễn Minh Vũ pơsit, Việt Nam hmâo laih tơlơi gum hơgôp sit nik kiăng pơtrut kơtang pok pơhai bruă mă gah Đah kơmơi, Mơ-ak klă hăng Rơnuk rơnua (WPS) amăng ASEAN, biă ñu amăng rơwang bruă Khua ASEAN thun 2020. Bơkơtuai tal anai lĕ tơlơi tô̆ tui hơdôm tơlơi gir run mơng Việt Nam anăp nao pơjing hăng ngă tui tơlơi pơplih bruă pơhlôm tơlơi dưi đah kơmơi, ngă gal brơi kơ đah kơmơi gum hrom amăng hơdôm bruă ba tơbiă tơlơi pơsit, ngă tui bruă amăng pơsir hơdôm tơlơi ƀu bưng truh hăng tơlơi lông pơhuĭ truh tơlơi rơnuk rơnua kơjăp phik mơng kual. Hluai tui bruă Bơkơtuai, ƀing khua pơ ala čang rơmang ASEAN amra ĕp ƀuh jơlan nao tô̆ tui kiăng pơdŏng Kơcăo bruă ngă kual kơ Đah kơmơi, Mơ-ak klă, Rơnuk rơnua (RAP) hăng hơdôm tơhnal ba tơbiă, bruă mă rơđah rơđông./.

Siu H’ Prăk: Pơblang