VOV4.Jarai - Mơguah lơ 16/8, Ding jum kông ang gum hrom hăng Sang hră pơtô bruă kơđi čar Hồ Chí Minh dêh čar ta sit nik pơphun bơkơtuai bôh thâo phrâo lŏn ia: “Ngă tui pran kơtang abih bang djuai ania pơgang rơnuk rơnua plơi pla lŏn ia amăng rơnuk phrâo”. Amăng mông bơkơtuai, ƀing khua pơ ala đing nao ngă rơđah tơlơi kiăng hloh hăng hơdôm tơlơi kiăng ngă tui pran kơtang abih bang djuai ania pơgang rơnuk rơnua plơi pla lŏn ia amăng rơnuk phrâo; Pơblang ngă rơđah tơlơi pơđĭ kyar tơlơi pơmin pơblang bruă Ping gah, biă ñu hơdôm tơlơi pơmin phrâo amăng bruă Jơnum tal  13 kơ ngă tui pran kơtang abih bang djuai ania pơgang rơnuk rơnua plơi pla lŏn ia.

Anih anom bơkơtuai

Hrom hăng anun ngă rơđah tơlơi hmâo hăng ba tơbiă hơdôm bruă mă, jơlan gah ngă tui pran kơtang abih bang djuai ania pơgang rơnuk rơnua plơi pla lŏn ia amăng rơnuk phrâo ba glăi bôh tŭ yua hăng sit nik. Bôh tơhnal mơng bruă bơkơtuai lĕ phun than kiăng rơkâo hăng khua git gai Ping gah, Kơnuk kơna hmâo hơdră pơtrun, jơlan gah ngă tui pran kơtang abih bang djuai ania pơgang rơnuk rơnua plơi pla lŏn ia, djru pơgang Lŏn ia “mơng tañ” “mơng ataih”, djru ba glăi bôh tơhnal bruă pơđĭ kyar bơwih ƀong, boh thâo, mơnuih mơnam hăng pơtom hiăp mơng lŏn ia./.

Siu H’ Prăk: Pơblang