VOV4.Jarai - Ƀrô djơ̆ tal Grŭp Khua pơ ala gưl dlông Khua pơ ala mơnuih ƀôn sang dêh čar Lao rai čuă mă bruă ƀơi Việt Nam hăng nao pơhmư̆ hơdôm bruă mă “Thun gum hrom hơbit Giăng mah” hơdor glăi 60 thun Hrơi pơdŏng bruă pơtom hiăp hăng 45 thun Hrơi kĭ pơkôl Giăng mah hăng Gum hrom Việt Nam – Lao, amăng čơtlăm 19/7, Grŭp Khua pơ ala mơnuih ƀôn sang dêh čar Việt Nam yua kơ Ding kơna Ding jum kơđi čar, Kơ-iăng Khua git gai wai lăng pơ ala mơnuih ƀôn sang dêh čar ta ơi Trần Thanh Mẫn ngă Khua Grŭp hmâo mông Bơkơtuai hăng Grŭp Khua pơ ala mơnuih ƀôn sang dêh čar Lao yua kơ ơi Xủn-thon Xay-nha-chắc, Kơ-iăng Khua git gai wai lăng pơ ala mơnuih ƀôn sang dêh čar Lao ngă Khua Grŭp. Hăng tơlơi čang rơmang ƀu pơdơi pơđĭ tui hloh dong anô̆ kơjăp gum hrom kơplah wah dua bôh dêh čar pơ̆ anăp anai, dua Khua pơ ala mơnuih ƀôn sang hmâo tŭ ư đing nao pok pơhai ba glăi bôh tơhnal kơplah wah dua Ding jum kơđi čar thun 2022, Tơlơi pơkôl gum hrom kơplah wah Khua pơ ala mơnuih ƀôn sang; Kơtưn bơkơtuai tơlơi găn rơgao čih pơkra hơdră bruă gum djru, tơlơi phiăn amăng wai lăng bruă prong hăng hơkrŭ glăi bruă bơwih ƀong – mơnuih mơnam amăng “tơlơi hơđong phrâo”; Pơtrut pơđĭ dlông bôh tơhnal gum hrom gah apui yua, pơtô pơhrăm, bruă ia jrao, bơkơtuai gah mơnuih ƀôn sang hăng gum hrom kơplah wah hơdôm plơi pla, biă ñu lĕ gum hrom kơplah wah hơdôm grŭp khua pơ ala mơnuih ƀôn sang, Khul pơ ala mơnuih ƀôn sang hơdôm bôh tơring čar, ƀôn prong dua bôh dêh čar./.

Siu H’ Prăk: Pơblang