VOV4.Jarai - Kiăng ĕp hmâo jơlan ngă tui ba glăi bôh tơhnal gal, anô̆ gơgrong kơjăp kơ tơlơi pơđĭ kyar tuai čuă ngui Kontum lăi ha jăn hăng kual Dăp Kơdư hăng hrom, ƀơi plơi prong Kontum amăng rơwang hrơi tơjuh rơgao, Ding jum bôh thâo bơkơjăp drơi jăn hăng tuai čuă ngui gum hrom hăng Jơnum min mơnuih ƀôn sang tơring čar Kontum pơphun Bơkơtuai “Tuai čuă ngui Kontum – Tơhnal gal hăng tơlơi čang rơmang”.

Bruă bơkơtuai “Tuai čuă ngui Kontum – Tơhnal gal hăng čang rơmang” thun 2022 ngă pơhư̆č tơlơi gum hrom mơng giăm truh 500 čô khua pơ ala lĕ hơdôm mơnuih wai lăng, juăt bruă ba jơlan hlâo gơnong bruă; Khul, grŭp anom bơwih ƀong wai lăng tuai čuă ngui, sang jưh tuai, dŭ pơgiăng; khua pơ ala rai mơng sa dua bôh tơring čar kual Dơnung dêh čar Lao, Ngŏ Pơngŏ dêh čar Kur hmâo hrom sa jơlan guai dêh čar hăng tơring čar Kontum.

Khua pơ ala gum hrom bơkơtuai

Pơhiăp amăng mông bơkơtuai, Khua Ding jum bôh thâo, bơkơjăp drơi jăn hăng tuai čuă ngui dêh čar ta ơi Nguyễn Văn Hùng pơsit, Ding jum hăng hơdôm tơring čar, ƀôn prong amăng đơ đam dêh čar ta glăk hmâo lu jơlan gah, tơhnal klă pơphun hơdôm bruă mă kiăng hơkrŭ glăi bruă tuai čuă ngui tơdơi kơ klin Covid-19. Bruă bơkơtuai “Tuai čuă ngui Kontum – Tơhnal gal hăng čang rơmang” jing tơhnal gal pioh anom bơwih ƀong pơbưp nao rai, bơkơtuai, kĭ pơkôl gum hrom amăng bruă tuai čuă ngui. Tui hăng Khua Ding jum, tơring čar Kontum hmâo laih 2 bôh than yôm phăn pioh pơđĭ kyar bruă tuai čuă ngui:

“Ƀing gơmơi lăng ƀuh hmâo dua mơta tơlơi phun mơ̆ Kontum hmâo hăng tum pơƀut djop kiăng ƀing ta pơđĭ kyar tuai čuă ngui. Sa lĕ, Kontum hmâo djop hơdôm bôh than dlai tlô hăng kông ngăn bôh thâo đưm kiăng ƀing ta ngă bruă tuai čuă ngui ƀu pha ra mơn hăng adơi amai. Dua lĕ ană mơnuih Kontum hăng pran jua tơpă, klă, triăng mă bruă, lăng jê̆ giăm hăng thâo tơngia. Ƀing gơñu yơh hơdôm pô pioh dui tơkai yak mơng tuai hyu čuă ngui”.

Khua Ding jum Nguyễn Văn Hùng pơhiăp amăng mông bơkơtuai

Amăng mông bơkơtuai, ƀing khua pơ ala hmâo bơkơtuai, pơsit tơhnal gal hăng tơlơi čang rơmang pơđĭ kyar tuai čuă ngui mơng tơring čar Kontum hăng ƀuh rơđah lĕ gru grua bôh thâo pha ra, lu anih anom hiam, kah hăng: čư̆ Ngọc Linh gah Kual pơgang dlai tlô Ngọc Linh; čơlah 3 guai lŏn ia Việt Nam – Lao – Kur; kual tuai čuă lăng dlai tlô lŏn ia Măng Đen – Kon Plông... Khă hnun hai, kiăng pơđĭ kyar bruă tuai čuă ngui tui hăng Kơ-iăng nai tha prin – Nai prin tha Trần Đình Nguyên, pô juăt bruă bơwih ƀong, Khua hơđăp Anom kơsem min bruă bơwih ƀong Việt Nam lĕ hrom hăng pơgang, wai lăng anô̆ yôm, lu mơta, pơđĭ tơhnal gơnam tam, Kontum khom dưi pơsit rơnoh đĭ kyar, kiăng đing nao pơđĭ kyar tuai čuă ngui:

“Kontum khom tô hluh gah jơlan nao rai kiăng yua mă pran. Ƀơi anai bơhmutu ñu kah hăng Bờ Y. Kiăng Bờ Y đĭ kyar Bờ Y khom tô jơlan nao pơ̆ dêh čar Lao, khom tô jơlan nao pơ̆ dêh čar Kur tui djơ̆ bôh pia pok bah amăng mut hrom. Lom anun Bờ Y mơng pơplih hơdôm anô̆ gal plơi pla jing anô̆ gal mơng pô pioh đĭ pran hơdip kơ tuai čuă ngui. Kiăng đing nao hơdră bruă hăng ngăn rơnoh kơ hơdôm črăn bruă đing nao anun lĕ thâo đing nao hơdôm mơta pơđĭ kyar. Sa lĕ plơi prong Kontum, dua lĕ Măng Đen hăng 3 lĕ hmâo sa jơlan ba nao pơ̆ jơlan čơlah 3 guai lŏn ia”.

Bơkơtuai gum tơngan hrom pơđĭ kyar tuai čuă ngui Kontum

Tơpă ară bŏng glăi hăng tơlơi ƀu klă samơ̆ ƀu ngă rơngiă pran đăo gơnang ôh, yă Trần Nguyện, Khua Grŭp bơwih ƀong Grup Sun Group lăi lĕ, amăng bruă tuai čuă ngui Kontum lăi ha jăn hăng Dăp Kơdư lăi hrom hmâo lu tơlơi akă ngă hăng kơƀah lu mơta, kah hăng anih anom mă yua; Kơƀah mơnuih tuh pơplai prong; Tơlơi pơsit pơkă kual; Tơlơi ƀu kơjăp amăng bôh thâo kơ mơnuih mă bruă gah gơnong bruă tuai čuă ngui... Hăng tơdah kiăng pơđĭ kyar bruă tuai čuă ngui khom dưi pơsir hơdôm tơlơi lông anai:

“Anai lĕ hơdôm tơlơi mơ̆ akô̆ phun. Tơdah pơđĭ kyar khom pơsir hơdôm tơlơi lông anai hăng ƀing ta ăt čang rơmang mơn hăng tơlơi gum pơhiăp mơng ƀing gơmơi hăng tơlơi gum hrom mơng hơdôm bôh anom bơwih ƀong pơkon ăt amra djru mơn kơ anih nao pơ̆ Kontum ƀơƀrư̆ dưi pơsir hơdôm tơlơi lông hăng ƀing ta amra hmao kiăo tui tơhnal gal, kiăo tui tlôn samơ̆ amra nao tañ biă”.

Kĭ pơkôl hră gum hrom pơđĭ kyar bruă wai lăng tuai čuă ngui

Amăng mông Bơkơtuai “Tuai čuă ngui Kontum – Tơlơi gal hăng čang rơmang” thun 2022, Ding jum bôh thâo, bơkơjăp drơi jăn hăng tuai čuă ngui dêh čar lăi pơthâo kơčăo bruă pơđĭ kyar tuai čuă ngui kual Čơlah 3 pơđĭ kyar Kur – Lao – Việt Nam rơwang mơng thun 2021-2025, tơhnal lăng nao truh kơ thun 2030; Gơnong bruă bôh thâo, bơkơjăp drơi jăn hăng tuai čuă ngui tơring čar Kontum lăi pơthâo Logo hăng slogan tuai čuă ngui tơring čar Kontum “Găn rơgao lăng bôh thâo – Hơduăh ĕp dlai tlô”; Kĭ pơkôl hră gum hrom kơ djru hơkrŭ glăi bruă mă mơng hơdôm bôh anom wai lăng tuai čuă ngui kơplah wah tơring čar Kontum hăng Khul wai lăng tuai čuă ngui 3 bôh ƀôh prong: Hà Nội, Đà Nẵng hăng Hồ Chí Minh; Gơnong bruă bôh thâo, bơkơjăp drơi jăn hăng tuai čuă ngui tơring čar Kontum ăt kĭ pơkôl mơn hăng Khul pơlir hơbit wai lăng tuai čuă ngui Việt Nam kiăng đĭ tui mrô mơnuih hyu čuă ngui pơ̆ tơring čar./.

Khoa Điềm: Čih – Siu H’ Prăk: Pơblang