VOV4.Jarai-Jơnum min mơnuih ƀôn sang ƀôn prong HCM phrâo ngă hră pơar mơ-it Gơnong bruă Pơtô hăng Pơjuăt hrom hăng djop gơnong bruă pơdjơ̆ hrom tŭ ư jơlan hơdră akŏ pơjing pơkra hơdră rơnoh prăk djru prăk hrăm hră mơ̆ng thun 2022-2023 hăng hơdôm thun tŏ tui dơ̆ng. Tui hăng tơlơi lăi pơthâo lơ 19/5/2022 mơ̆ng Gơnong bruă Pơtô hăng Pơjuăt ƀôn prong HCM kơ jơlan hơdră djru prăk hrăm hră kơ čơđai sang hră gưl dua amăng sang hră kơnuk kơna hăng gah rơngiao kơ kơnuk kơna mơ̆ng thun hrăm 2022-2023 hăng hơdôm thun tŏ tui amăng ƀôn prong HCM, Jơnum min mơnuih ƀôn sang ƀôn prong HCM tŭ ư hăng tơlơi rơkâo anai, brơi pơkă hnong rơnoh prăk djru hrăm kơ čơđai sang hră hrăm amăng sang hră kơnuk kơna hăng sang hră mơnuih ƀôn sang ngă pô mơ̆ng thun 2022-2023.

Jơnum min mơnuih ƀôn sang ƀôn prong HCM jao kơ Gơnong bruă Pơtô hăng Pơjuăt git gai, ngă hrom hơdôm anom bruă pơkŏn kơsem min lăng čih pơkra dăp hơdră djru gêh găl kơ djop gưl hrăm hră mơ̆ng gưl sa kiăng ngă plai ƀiă tơlơi bơbeč djơ̆ kơ mơnuih mơnam yua hơmâo tơlơi pơkă pơđĭ trun prăk hrăm hră tui Hră pơtrun mrô 81/2021/NĐ-CP mơ̆ng kơnuk kơna.

Nay Jek: Pơblang