Mơ̆ng thun 2020 truh ră anai, hăng bruă ngă Khua anih jưh pơ ala Singapore ƀơi ƀôn prong Hồ Chí Minh, ơi Kho Ngee Seng Roy lêng kơ gir ngă bruă, djru kơ Kơnuk kơna, anom bơwih ƀong hăng mơnuih ƀôn sang Singapore, gum pơgôp hơmâo 1 klăk 500 rơbâo dolar Mi hăng gơnam yua gah ia jrao kơ ƀôn prong Hồ chí Minh hluai tui Keh prăk Văc-xin mơ̆ng Việt Nam.

Laih dong ngă hrŏm kơjăp hăng hơdôm anom bruă mơ̆ng Việt Nam, biă ñu lĕ ƀơi ƀôn prong Hồ Chí Minh pơphun lu bruă pơtom hiăp bơbưp mơnuih ƀôn sang dua bơnah, amăng anun hơmâo ngă lơphet 50 thun rô nao rai kơplah wah Việt Nam hăng Singapore, 10 thun pơphun ngă gŏp yôm kơplah wah dua boh dêh čar. Ñu ăt gum djru amăng bruă pơphun mông bơbưp yơyôm hăng khua mua pơprong, amăng anun hơmâo mông bưp yua Khua mir sir Singapore Halimah Yacob ba akŏ amăng thun 2022. Hơdôm tơlơi gir run mơ̆ng ñu jing pơtrut tui tơlơi rô nao rai amăng bruă sĭ mơdrô, tuai hyu ngui, pơtô hrăm, gru grua hăng djŏp bruă ngă hrŏm mơnuih ƀôn sang.