VOV4.Jarai - Adai pơ-iă hang, không phang sui ngă lu đang glai, amăng mrô rơbêh 609.000 ektar glai pla hăng glai hơmâo hơđăp ƀơi tơring čar Kon Tum amuñ hơmâo apui ƀong. Hrŏm hăng anun, mông anai lĕ hrơi blan ană plơi juăt čuh tơnuh, čuk ter guai prăp lui bơyan pla phrâo anun jing amuñ hơmâo apui ƀong glai mơn. Ƀơi anăp tơlơi anai, tơhan apăn bruă ƀơi tơring čar Kon Tum hrŏm hăng anom bruă wai lăng glai hăng gong gai hơdôm plơi pla pơtrut tui bruă pơgang glai rưng.  

Đang hmua giăm glai rưng anun jing amuñ hơmâo apui ƀong glai biă.

Pơtŏng glăi hơdôm đang glai amuñ hơmâo apui ƀong hloh, amuñ hơmâo ană plơi tek nao amăng mông čông jơnah jah glai, tơhan wai lăng glai tơring čar Kon Tum hrŏm hăng anom bruă wai lăng glai, gong gai pơƀut hyu tir, dŏ gak hrơi mlăm mơtăm. Hăng hơdôm kual glai giăm đang hmua mơnuih ƀon sang, tơhan wai lăng glai brơi ană plơi kĭ hră ƀuăn ƀu dưi tek nao, ngă sat amăng lŏn glai ôh.