Hơmâo pơphun ngă mơ̆ng lơ 10/7 truh ră anai, Bruă Hlăk ai djru bơyan pơdơi prong mơtah tơring čar Dak Lăk thun anai hơmâo ngă ƀơi 9 boh să,tơring kual gah 7 boh tơring glông amăng Dak Lăk. Amăng 15 hrơi rơgao, hlăk ai tơdăm dra tơring čar hơmâo pok 28 anih hrăm pơtô brơi kơ 700 čô čơđai hrăm gưl sa hăng gưl 2; 1 anih pơtô brơi mơnuih ƀu thâo hră ƀơi să Ea Hiu, tơring glông Krông Pač. Pơphun 93 wơ̆t jơnum ngui hlăk ai, adoh suang ƀơi hơdôm boh plơi; hơmâo pơtô, pôr pơhing hơdôm jơlan hơdră tơlơi pơtrun mơ̆ng Ping gah, tơlơi phiăn mơ̆ng Kơnuk kơna, rơmet rơmot anih dŏ; pơtô tơlơi suaih pral tơkeng weng kơ ƀing čơđai aka ƀu truh thun dŏ rơkơi bơnai, ƀă ană aset, pơgăn tơlơi răm ƀăm. Hơmâo ngă 17 ring bruă kah hăng: tŭi rơđah jơlan nao rai amăng plơi, pik ia kulơr pơnăng sang, pơkra glăi sang jơnum plơi pla; hyu kor rơmet amăng bưng pơđoh ia, pla kyâo, pla bơnga hơmâo anăn hlăk ai.