VOV4.Jarai - Tlam lơ 16/3, ƀơi ƀon prong Hồ Chí Minh, Khua mir sir ơi Nguyễn Xuân Phúc nao pơhmư̆ mông ngă lơphet Brơi hră bơni Tơhan blah ngă sông kơtang kơ ơi Lữ Minh Châu, Kơ-iăng khua hơđăp bruă prăk yôm N2683, Khua hơđăp sang bruă prăk Kơnuk kơna Việt Nam. Pơ ala kơ khua mua ping gah, kơnuk kơna, Khua mir sir ơi Nguyễn Xuân Phúc hơmâo brơi Hră bơni Tơhan blah ngă sông kơtang kơ pô sang ơi Lữ Minh Châu. Pơhiăp ƀơi mông ngă lơphet, Khua mir sir ơi Nguyễn Xuân Phúc lăi rơđah, ta dưi lăi tui anai, amăng rơnuk blah ngă kơtang ƀơi kual Dơnung, lơ̆m anun ñu ngă Kơ-iăng khua bruă prăk yôm phara, ơi Lữ Minh Châu hrŏm hăng ƀing gŏp ñu amăng anom bruă prăk thâo pơčeh mă, pơsit mă pô ngă klă bruă lăi pơthâo glăi kơ Anom bruă prăk kăk kual Dơnung, ƀu hŭi kơ tơnap tap glêh glar, khin hơtai, rơgơi bruă, dưi găn rơgao abih anih ayăt dŏ gak, dŏ krăp, đah mơng pơgiăng nao hơdôm rơtuh klăk dolar, brơi kơ ling tơhan ta, bơwih brơi bruă hơkrŭ kual Dơnung, ngă giong bruă hơmâo Ding jum kơđi čar, Ping gah hăng Kơnuk kơna ta jao.

Siu H’Mai: Pơblang