Bruă pok jơlan mur mut amăng čư̆ glông hloh ƀơi glông jơlan rơdêh đuăi hmar pơtruh glai rưng hăng ia rơsĭ, jing yom biă mă đah mơ̆ng dưi brơi rơdêh nao rai ƀơi djŏp glông jơlan mơtăm amăng rơnuč thun 2026 hăng ba mă yua amăng akŏ thun 2027. Jơlan mur mut amăng lăm čư̆ Phượng Hòang, plah wah dua boh tơring Dak Lăk hăng Khánh Hòa, glông 1,7km, dong amăng kơčăo bruă XL01, kơčăo bruă črăn 2, yua Khul wai lăng kơčăo bruă mrô 6 (Ding jum man pơdong) ngă pô tuh pơ alin.

Pơphun man pơkra mơ̆ng blan 4/2024, giăm 600 čô apăn bruă man pơkra, ƀing kĭ sư, kông ñơn hrŏm hăng năng ai 180 boh rơdêh, măi mok pơkra jơlan hơmâo ngă bruă na nao, ƀu pơdơi pơdă, pơtruh jơlan mur mut amăng čư̆ gah hnuă amăng blan 10 thun hlâo, laih anun truh rơnuč blan 12 phrâo rơgao pok pơtruh hăng jơlan mur gah iao. Anung prăk pơkra jơlan XL01 gah Kơčăo bruă črăn 1 jơlan rơdêh đuăi hmar Khánh Hòa - Buôn Ma Thuột glông 11km. Hrŏm hăng jơlan mut amăng čư̆ Phượng Hòang, anung prăk anai hơmâo pơkra 10 ƀĕ tơdrông toa hăng lu črăn jơlan dong. Ră anai bruă man pơkra jơlan ƀơi abih bang hơmâo ngă giăm 90% laih.