Ƀơi mông Jơnum, Khua dêh čar ơi Phạm Minh Chính lăi rơđah: ngă tui bruă đĭ kyar bơwih ƀong huă mơnuih mơnam thun 2025 hăng rơwang thun 2021-2025 amăng hrơi mông ƀơi rŏng lŏn tơnah pơplih tañ, phara biă mă, hăng lu bruă aka ƀu hơmâo djơ̆ ôh mơ̆ng hlâo, rơgao kơ hơnong pơkă lăng. Amăng dêh čar, tơlơi bơwih ƀong glăk pơplih, khŏm pioh pran jua, hrơi mông dăp glăi lŏn ia ƀơi Gơnong dlông wơ̆t ƀơi plơi pla; tơlơi truh lŏn adai ngă, hơjan kơthel ia dăo răm rai kơtang biă kơ bruă bơwih ƀong mơdrô hăng tơlơi hơdip mơnuih ƀôn sang. Mah hnun hai, boh than dưi ngă hmư̆ hing amăng djŏp bruă mă.

Thun 2025 Việt Nam hơmâo rơnoh đĭ kyar 8,02%, dong amăng khul dêh čar hơmâo rơnoh đĭ kyar lu mơ̆ng kual, ƀơi rŏng lŏn tơnah, laih dong bong kjăp, hơđong bruă bơwih ƀong, pơgăn bruă pơđĭ nua gơnam ča čot; wai lăng tơlơi hơdip mơda mơnuih ƀôn sang; bruă pơgang lŏn ia, rơnuk rơnua hơmâo hơkrŭ kjăp tui mơn, bruă pơtom hiăp, mut hrŏm jar kmar hơmâo pơđĭ tui mơn; tơlơi hmư̆ ư, kơdrưh mơ̆ng lŏn ia ta jai hrơi đĭ tui. Ngă giong bruă lŏm hĭ sang dŏ tơ̆i, sang phô̆. Man pơdong ha amăng plĕ 100 boh sang hră pơlir hơbit gưl sa hăng gưl dua ƀơi hơdôm boh să gah guai dêh čar. Tui hăng Sang gum hơbit djŏp dêh čar, mrô pơkă anŏ yâo mơak mơ̆ng Việt Nam thun 2025 dong tal 46, đĭ 37 wơ̆t pơhmu hăng thun 2020. Pok pơhai ngă bruă khut khăt, tŭ yua bruă dăp glăi anom bruă čar mơ̆ng Kơnuk kơna truh pơ gong gai dua gưl nao hrŏm hăng pơtrut jao bruă kơ gưl, anom bruă. Mông jơnum ba tơbiă 10 mơta bruă, hơdră ngă phun kiăng đĭ kyar bơwih ƀong huă - mơnuih mơnam thun 2026 hăng hơdôm thun pơ anăp dong, pơplih tơlơi pơmin đah mơ̆ng ngă bruă kơtang hloh, tŭ yua hloh Tơlơi pơtrun Jơnum ping gah dêh čar tal 14, hơdôm jơlan ngă bruă mơ̆ng Kơnuk kơna.