Đại tá Hồ Song Ân tơkeng thun 1978, plơi pla pơ̆ tơring čar Quảng Nam, dưi Khua Ding jum Kông ang brơi nao hăng ruah ngă Khua Kông ang tơring čar Dak Nông pơhrua kơ Đại tá Nguyễn Thanh Liêm hmâo brơi ba nao ngă Khua Kông ang tơring čar Quảng Bình. Bruă Đại tá Hồ Song Ân dưi ba nao, ruah ngă Khua Kông ang tơring čar Dak Nông pơdah tơlơi đăo kơnang mơ̆ng Ping gah Kông ang dêh čar ta, Khua Ding jum Kông ang hăng tơring čar Dak Nông.

Čơkă mă bruă phrâo, ƀơi anih anom phrâo, Khua Kông ang tơring čar Dak Nông phrâo ruah ƀuan amra ngă tui đut hlah hơdôm tơlơi găn rơgao amăng bruă mă; gum pran hrŏm, ha pran jua hăng Grŭp Ping gah, Grŭp Khua mua Kông ang tơring čar hăng abih bang mơnuih apăn bruă kông ang, tơhan kông ang ngă giong klă bruă hmâo jao./.