Ngă tui tơlơi pơplông gum hrŏm man pơdong plơi pla phrâo, gum tơngan hrŏm djru brơi mơnuih ƀun rin, 5 thun laih rơgao, ling tơhan tơring čar Dak Lak hơmâo jak iâu rơbêh 2.300 wŏt mơnuih apăn bruă, ling tơhan hăng giăm 20.000 hrơi mă bruă djru brơi mơnuih ƀôn sang kual tơnap tap. Jak iâu pơgôp rơbêh 1 klai prăk man pơdong sang brơi hơdôm boh sang anŏ tui hơdră djru, djru brơi rơmô, hlô rông, gơnam pioh bơwih ƀong huă brơi hơdôm boh sang anŏ ƀun rin. Amăng hrơi blan klin Covid-19 lar hyu, ling tơhan tơring čar hơmâo gum hrŏm hăng hơdôm khul grup kơđi čar mơnuih mơnam jak iâu pơgôp rơbêh 3 klai prăk djru brơi mơnuih ƀôn sang tơnap tap hăng lu hơbô̆ bruă ba glăi tŭ yua.

Nao jơnum hăng đĭ pơhiăp amăng mông jơnum, Trung tướng Thái Đại Ngọc, ding kơna khul apăn bruă Ping gah, Khua git gai ling tơhan Quân khu 5 lăng yôm, pơpŭ bơni hơdôm bruă pơplông, apah bơni ngă truh kih bruă jao mơng ling tơhan tơring čar Dak Lak amăng 5 thun rơgao. Hơdôm thun pơ anăp, kơđi amăng jar kmar, amăng kual amra tŏ tui ngă tơnap tap ƀu hmao thâo, amăng kual Quân khu, sit biă ñu ƀơi kual Dap kơdư ăt lĕ sa amăng hơdôm kual dŏ lu tơlơi amra ba truh rung răng. Khua git gai ling tơhan Quân khu rơkâo Ping gah-Khul pơplông hăng apah bơni, anom bruă git gai ling tơhan tơring čar Dak Lak đing nao git gai ngă tui klă hơdôm boh tơhnal akŏ phun:

“Hruă kjăp ngă tui tơlơi pơmĭn mơng Khua mir sir Hồ Chí Minh kơ bruă pơplông khăp kơ lŏn ia; ngă tui “5 tơlơi gir run, 5 tơlơi gơgrong” mơng Khua git gai Ping gah dêh čar ơi Nguyễn Phú Trọng; hơdôm hră pơ-ar djơ̆ tơlơi phiăn amăng ngă tui bruă pơplông, apah bơni. Ngă hiưm pă kiăng ƀing apăn bruă, ling tơhan hluh rơđah kơ tơlơi yôm mơng bruă pơplông, apah bơni hăng hơdôm bruă pơplông ngă truh kih, anai lĕ hơdôm bruă hơkrŭ mơng “Ling tơhan rơnuk wa Hô”, pơdah gru phara mơng ling tơhan mơnuih ƀôn sang Việt Nam”.

Ƀơi Dak Nông, 5 thun rơgao, bruă pơplông ngă truh kih bruă jao mơng ling tơhan tơring čar hơmâo pơtrut hrưn đĭ klă dong amăng bruă mă, pran kơtang amăng blah ngă, pơgôp yôm phăn ngă tui hơdôm hơnong pơkă pơđĭ kyar bơwih ƀong huă, mơnuih mơnam, hơkrŭ kjăp bruă wai pơgang rơnuk rơnua. Amăng 5 thun rơgao, hơmâo laih hơdôm hơpluh rơbâo čô mơnuih apăn bruă, ling tơhan djru brơi mơnuih ƀôn sang kual tơnap tap; dưi jak iâu gum pơgôp rơbêh 5,6 klai prăk man pơdong 78 boh sang gum pơgôp; djru 1,4 klai prăk brơi sang anŏ ƀun rin bơwih ƀong huă hrưn đĭ amăng tơlơi hơdip mơda; khăm, pơjrao brơi giăm 1.900 čô mơnuih kual ataih, asuek.

Amăng rơwang thun 2019-2024 đơ đam tơring čar hơmâo ruah, lăi pơthâo 67 khul grup, 82 čô mơnuih ba gru djop mơta amăng rĭm bruă. Amăng 5 thun rơgao hơmâo laih 31 khul grup hơmâo Ding jum ling tơhan hăng Quân khu 5 tŭ yap lĕ anih anom kơtang amăng djop mơta “tơpă sit, ba gru”.

Amăng mông jơnum, Trung tướng Thái Đại Ngọc, Khu git gai ling tơhan Quân khu 5 pơpŭ bơni ling tơhan tơring čar Dak Nông hơmâo gum pơgôp, gơgrong, pơčeh phrâo pok pơhai djop mơta tal pơplông ngă truh kih bruă jao. Amăng rơnuk phrâo anai, Trung tướng Thái Đại Ngọc rơkâo Ping gah, anom bruă git gai ling tơhan tơring čar Dak Nông tŏ tui hruă kjăp tui tơlơi pơmĭn mơng Khua mir sir Hồ Chí Minh kơ bruă pơplông khăp kơ lŏn ia.

“Đing nao bruă ĕp, pơtô pơjuăt, lăi pơthâo brơi abih bang hơdôm hơbô̆ bruă pơplih pơčeh phrâo, ba glăi tŭ yua, khul grup, ƀing mơnuih ba gru, rơgơi bruă. Ƀing mơnuih ba gru lĕ hơdip khul grup, ƀing mơnuih hơmâo tơlơi pơčeh phrâo mơ̆ ƀing pơkŏn aka ƀu pơmĭn tơbiă, găn rơgao tơnap tap mơ̆ dŏ lu mơnuih aka ƀu dưi ngă; dưi ngă hơdôm bruă mơ̆ lu mơnuih aka ƀu khin ngă ƀudah aka ƀu dưi ngă, thâo pơčeh phrâo, thâo pơmĭn khin ngă. Pơplông kiăng pơlir hăng bruă apah bơnu hmao tlôn brơi ƀing rơgơi bruă”.

Mơng jơnum pơplông ngă truh kih bruă jao gah ling tơhan rơwang thun 2019-2024, sa wŏt dong brơi ƀuh, ƀing apăn bruă, ling tơhan hơdôm boh tơring čar Dak Lak hăng Dak Nông, mah hiưm pă tŭ mơn lêng kơ pơdah pran ngă hơkrŭ, ba jơlan hlâo, kjăp bruă, tơpă sit, kơdong glăi bruă ngă soh. Jai tơnap tap, glêh glar ling tơhan jai kiăng pơplih pơčeh phrâo; ngă pơgiong bruă jao brơi ling tơhan amăng blah ngă, bruă mă, bruă bơwih ƀong mơng ling tơhan mơnuih ƀôn sang Việt Nam./.