VOV4.Jarai - Khul pơlir hơbit Hlăk ai Việt Nam hăng Khul ơi ia jrao hlăk ai Việt Nam phrâo pơphun ngă Lơphet lăi pơthâo Bruă ơi ia jrao hlăk ai ngă tui tơlơi Wa Hồ, gum djru yua kơ tơlơi suaih pral plơi pla thun 2022 hăng anăn ñu “Bơwih brơi tơlơi suaih pral tơdơi kơ Covid-19 ngă”. Hơdôm hrơi rơgao, ƀơi hơdôm anih anom amăng dêh čar ta ăt hmâo pok pơhai mơn lu bruă gum djru yua kơ tơlơi suaih pral plơi pla.

Bruă ơi ia jrao hlăk ai ngă tui tơlơi Wa Hồ, gum djru yua kơ tơlơi suaih pral plơi pla pơphun mơng lơ 14/5 truh abih thun anai, đing nao bơwih brơi tơlơi suaih pral kơ mơnuih ƀôn sang tơdơi kơ Covid-19 ngă, hăng tơhnal pơkă 20 rơbâo čô ơi ia jrao hlăk ai hyu pel ep, lăi pơthâo, bơwih brơi tơlơi suaih pral tơdơi kơ Covid-19 ngă brơi rơbêh kơ 1 klăk čô mơnuih ƀôn sang; rơbêh kơ 3 klăk čô mơnuih dưi pel ĕp abih bang hăng lăi pơthâo ƀơi anăp; 100.000 čô mơnuih dưi lăi pơthâo, pel ĕp ƀơi anăp.

Bruă mă ăt pơsur mơn mơnuih amăng khul hlăk ai, tơdăm dra gum hrom brơi 50.000 anung drah, pơtrut pơsur 1 klăk čô mơnuih mơng khul hlăk ai pơhrăm pran jua, hrăm tui tơlơi gru Wa Hồ; pơhrăm, prăp lui bôh thâo kơ 100.000 čô mơnuih hyu gum djru lăi pơthâo mơnong ngă bơbuă hăng bôh thâo pơgang hlôm hlâo klin kheng. Abih bang mơnuih ƀôn sang hmâo ƀă Covid-19 dưi ngă juăt hăng hră pơ-ar bơwih brơi tơlơi suaih pral tơdơi kơ Covid-19. Khua khul ơi ia jrao hlăk ai Việt Nam Hà Anh Đức brơi thâo:

“Bruă ơi ia jrao hlăk ai ngă tui tơlơi Wa Hồ - Yua kơ tơlơi suaih pral plơi pla. Thun anai, ƀing gơmơi đing nao dong, anun lĕ anăp nao hơdôm mơnuih ƀă Covid-19, ăt lĕ anăp nao bruă Jơnum Khul hlăk ai đơ đam dêh čar. Tal blung a mă yua hơdôm hơdră phrâo măi mok phrâo rơngiao kơ bruă pel ĕp, pơjrao tơlơi ruă ƀơi anăp, ƀing ta hmâo măi hotline amra djru sui bruă mă hăng mơnuih ƀôn sang kiăng gum djru hloh, hrom hăng anun rơgao kơ lăi pơthâo hăng telephone, teleheath, kiăng ƀơi anăp lăi pơthâo kơ mơnuih ƀôn sang”.

Khua Grŭp bơwih ƀong dêh čar Trần Tuấn Anh pơhiăp amăng mông ngă lơphet pơphun bruă mă

Gum nao pơhmư̆ mông ngă lơphet pok phun gưl kơnuk kơna ƀơi tơring čar Thừa Thiên – Huế, Khua Grŭp bơwih ƀong dêh čar ta ơi Trần Tuấn Anh pơsĭt yôm “Bruă ơi ia jrao hlăk ai ngă tui tơlơi Wa Hồ, gum djru yua kơ tơlơi suaih pral plơi pla” thun anai, hrom hăng pơsit: amăng rơwang tơlơi kơ klin Covid ngă, amra kiăng lu tơlơi gir run kiăng dô̆ hơdip mơda mơng mơnuih ƀôn sang amăng tơlơi hơđong phrâo, kiăng tơlơi suaih pral hăng pran jua mơnuih ƀôn sang, amăng anun hmâo khul mă bruă dưi pơhlôm, pơjing anih anom, anih gơgrong kơ bruă bơwih ƀong huă sĭ mơdrô hăng bruă mơnuih mơnam mơng lŏn ia dưi hơđong hăng pơđĭ kyar dong. Ơi Trần Tuấn Anh lăi rơđah:

“Kâo pơmin hăng pran jua pơčeh phrâo, ba jơlan hlâo, gum djru, pơsit pran yak rơgao djop tơlơi tơnap, Bruă ơi ia jrao hlăk ai ngă tui tơlơi Wa Hồ thun 2022 amra hmâo hơdôm bôh tơhnal ba tơbiă, hăng ha klkă čô mơnuih ƀôn sang dưi pel ĕp lăng, lăi pơthâo, hơkrŭ hăng pơplih tơlơi suaih pran tơdơi kơ Covid ngă. Kâo mơ-ak biă hăng hơdôm tơhnal ba tơbiă, pơsit jơlan gah hăng hơdôm tơhnal ba tơbiă anăp nao rim mơnuih ƀôn sang. Tơlơi anun pơdah bruă mă mơnuih ƀôn sang lĕ pô amăng glông bruă kơđi čar amăng hơdôm hơdră bruă hăng amăng hơdôm bruă mă kah hăng Khul hlăk ai”.

Khul ơi ia jrao hlăk ai Việt Nam gum hrom bruă mă

Amăng mông ngă lơphet lăi pơthâo, rơbêh kơ 1.200 čô mơnuih ruă Covid-19 dưi pel ĕp lăng, pơčrang lăng, pơtô brơi ngă hră bơwih brơi tơlơi suaih pral na nao, mă yua bôh thâo pơčeh pơjing mơng Vinbrain hăng anih anom phun bơwih brơi tơlơi suaih pral. Tal anai, Grŭp khua git gai Khul hlăk ai ăt ƀơk mơn 40 anung gơnam kơ hơdôm bôh sang anô̆ gah hơdră bruă hăng čơđai muai tơnap tap; hyu čuă jơmư tơña bla pơsur pran jua ơi nai ia jrao Sang ia jrao prong Huế dêh čar hăng mơnuih ruă gum hrom pel ĕp tơdơi kơ Covid-19 ngă...

Hơdôm hrơi rơgao, ƀơi hơdôm bôh tơring čar, ƀôn prong amăng đơ đam dêh čar ta ăt pơphun mơn bruă lăi pơthâo “Bruă ơi ia jrao hlăk ai ngă tui tơlơi Wa Hồ”. Hơdôm tơring čar, ƀôn prong hmâo pơphun pel ĕp bơwih brơi tơlơi suaih pral tơdơi kơ Covid-19 ngă, pơpha brơi ia jrao hăng ƀơk brơi rơbêh kơ 50.000 čô mơnuih ƀôn sang hăng čơđai muai tơnap tap amăng đơ đam dêh čar, hrom hăng anun lăi pơthâo, pơtô brơi hră pel ĕp, bơwih brơi tơlơi suaih pral na nao brơi rơbêh kơ 100.000 čô mơnuih ƀôn sang ngă hră. Nai prin tha – Ơi ia jrao Nguyễn Tiến Quang, Khua Khul wai lăng Sang ia jrao K (Hà Nội) pơsit:

“Ƀơi Sang ia jrao K ăt hmâo mơn khul ơi ia jrao hlăk ai gah Khul ơi ia jrao hlăk ai Việt Nam. Hluai tui anun, rơngiao kơ bruă pel ĕp pơjrao tơlơi ruă rim hrơi gah tơlơi ruă bơbrah asar, bơbrah bung ako, ƀing ơi ia jrao gum hrom bruă hrom, pel ĕp tơlơi suaih pral kơ mơnuih mơnam. Khul pơphun, ƀing gơmơi amra pơpha mông mă bruă, mơnuih mă bruă anai”.

Hlâo kơ anun, amăng rơwang klin Covid-19 ngă kơtang, Bruă ơi ia jrao hlăk ai ngă tui tơlơi Wa Hồ, gum djru yua kơ tơlơi suaih pral mơnuih mơnam ăt dưi pơphun mơn hăng jơlan gah pơplih tañ, djơ̆ hăng tơlơi kơdŏng glăi klin ƀơi hơdôm anih anom, nao hrom hăng bơwih brơi tơlơi suaih pral mơng ataih mă yua teleheath hăng gơgrong hlâo pel ĕp ƀơi plơi pla mơng hơdôm Khul, Grŭp ơi ia jrao hlăk ai amăng đơ đam dêh čar. Hrom hăng anun, Khul iâu pơhrui rơbêh kơ 130 klai gơnam tam djru khul ơi ia jrao pơgang pơgăn klin, mơbruă hăng hơdôm hơdră container ba hyu oxy, container pơčrang lăng kơman klin ba hyu hăng pel ĕp tơlơi ruă. Khul ơi ia jrao gum hrom hmâo iâu pơhrui giăm truh 20.000 čô mơnuih nao gum djru mă pô mơng đơ đam dêh čar, pel ĕp, ruah mă, lăi pơthâo hăng ba nao glông phun giăm truh 4 klăk wot čô mơnuih ƀôn sang. Per hră bơwih brơi tơlơi suaih pral lom ƀă Covid-19 mơng Khul dưi lăi pơthâo hăng rơbêh kơ 10 klăk wot tŭ mă./.

VOV1: Ruah mă – Siu H’ Prăk: Pơblang