Čroh ia Ea Tuôr bơyan anai ia bă blai, hnoh ia rô ƀơƀrĕ mut nao rơ-ưng boh pơtâo hơmâo čưp mơtah. Gah yŭ phun kơnia tha ha rơtuh thun, ơi Y Wer Ktul, khua ƀuôn Tuôr, să Hòa Phú hok mơak yua plơi ñu glăk pơplih tañ. Mơnuih ƀôn sang hlâo adih juăt bruă đang hmua, pla kơphê, tiu đôč, ră anai thâo bơwih bơwang čơkă tuai hyu ngui amăng plơi pla, pơƀuh gru grua hiam mơ̆ng djuai ania Êđê. Hăng hơdră ngă bruă phrâo, neh meh wa ƀrô đĭ kyar bơwih ƀong rah ƀrô bong glăi gru grua plơi pla, kiăng jua čing, jua hơgor, tơlơi adoh mơñi na nao amăng kual lŏn Dap Kơdư anai: “Blung hlâo kâo bơni kơ Kơnuk kơna djru ba ană plơi gơmơi. Kơ bruă pơmut hrŏm sang să, čang rơmang pơ anăp, gưl să, tơring čar lăng ba pơkra jơlan hiam kiăng mơnuih ƀôn sang nao rai mơak hloh, laih dong man pơkra bơnư̆, king ia pioh pruih kơ phun pla hăng pơđĭ kyar bruă tuai hyu ngui. Ngă gal brơi kiăng neh met wa dưi ngă bruă ƀơi Drai Nur, drai Gia Long, kiăng hrăm tui bruă arăng bơwih kơ tuai hyu ngui. Čang rơmang să djru ba prăk tuh pơ alin đĭ kyar bruă hyu čuă ngui, kiăng ƀing tuai nao ngui gơñu ƀuh plơi pla gơmơi pơplih tui, jai hrơi hiam, pơdrong hloh”.

Lơ̆m sang anŏ khua plơi Y Wer glăk pơmut pơdong glăi sang glông đưm yua yă ñu pioh glăi, či ngă anih čơkă tuai, jing ataih mơ̆ng anun hơdôm pluh hơyak đôč, sang anŏ amai H Belly Êban ăt pok anih homestay amăng sang glông đưm. Amai H Belly brơi thâo, homestay ñu bơwih lu biă ñu kơ ƀing tuai čar rơngiao. Blung a, ñu pơmin ngă bruă bơwih kơ tuai hyu ngui tơnap biă, samơ̆ lơ̆m ngă ñu lăng huăi glêh tơnap hơget lơi:“Bơni kơ Kơnuk kơna djru brơi gơmơi hơmâo čơkă tuai amăng čar ta wơ̆t hăng mơ̆ng čar rơngiao. Homestay Kathy kiăng pơƀuh brơi abih bang, lăi pơthâo hăng abih bang hlơi hơmâo sang đưm lĕ ta pioh glăi, ngă homestay pơƀuh kơ ƀing tuai hyu ngui thâo gru grua hiam mơ̆ng djuai ania Êđê. Kiăng ană tơčô ƀing ta thâo hăng djă pioh gru grua hiam mơ̆ng ơi yă ta đưm pioh glăi, anun lĕ sang glông, mơñam mrai, anun lĕ tơlơi pơhiăp. Kâo mơak biă mă yua hơmâo čơkă tuai mơ̆ng čar rơngiao rai ngui pơ homestay Kathy, gơñu hrăm tơlơi Êđê, buh eng ao mơ̆ng djuai ania gơmơi”.

Să Hòa Phú hơmâo akŏ pơdong mơ̆ng 3 boh să Hòa Phú, Hòa Khánh, Hòa Xuân, prong rơbêh 109km2, hơmâo giăm 50.000 čô mơnuih, jing anih dŏ hơdip mơ̆ng đưm hlâo laih mơ̆ng hơdôm boh plơi pla djuai ania Êđê, hơmâo ia krông Sêrêpôk hăng lu čroh hnoh rô nao, gêh gal prong biă či bơwih brơi kơ tuai hyu ngui. Tơdơi kơ pơmut hrŏm, dăp glăi anom bruă, să pơsit amra nao čuă jơmư ană plơi, kiăng hmư̆ tơlơi kiăng, tơlơi rơkâo mơ̆ng ană plơi...hloh kơ anun dong lĕ gum pơčrông hơdră đĭ kyar hăng hơdôm tơlơi hơmâo, tơlơi gêh gal pơ anai. Ơi Đỗ Xuân Hiếu, Kơ-iăng khua Jơnum min mơnuih ƀôn sang să Hòa Phú brơi thâo:“Gong gai ră anai jing anih bơwih brơi, ƀu hơmâo tơguan ană plơi rai tơña ôh, gong gai nao tơña hlâo, nao pơhiăp tom ană plơi, anom bơwih ƀong. Thâo hluh tơlơi kiăng khăp mơ̆ng ană plơi pla, anom bơwih ƀong kiăng čih hơdră djru brơi, čih hơdră ngă bruă, đah mơ̆ng dưi ngă tui hăng tơlơi kiăng mơ̆ng ană plơi pla”.

Hrŏm hăng đĭ kyar tuai hyu ngui, bơwih bơwang, amăng rơwang bruă phrâo anai, Ping gah să Hòa Phú ăt pơsit pơplih tañ tơlơi bơwih ƀong jing boh thâo măi mok - man pơdong, kiăng hơmâo anih anom plơi prong rơnuk phrâo. Mơ̆ng anun, huăi kơnang đơi dong tah kơ bruă ngă hmua tui ră anai, ngă phun atur kjăp đah mơ̆ng dưi ngă plơi prong măi mok boh thâo amăng thun 2035.

Ơi Phạm Tiến Hưng, Khua ping gah să Hòa Phú, tơring čar Dak Lăk lăi, hăng hơdôm tơlơi prăp rơmet, hơdră ngă bruă gah măi mok boh thâo phrâo, bơwih bơwang, ngă hmua mă yua măi mok yôm, să Hòa Phú gir plai ƀiă kơnang kơ prăk mơ̆ng tơring čar, kơnuk kơna pơpha brơi, anăp nao prăp rơmet mă pô, jing tơlơi pơtrut pơsur đĭ kyar mơ̆ng tơring čar Dak Lăk:“Tơlơi tơnap hloh mơ̆ng să Hòa Phú lĕ ngă hiư̆m pă amăng 5 thun pơ anăp, anih anom, tơlơi hơdip mơnuih ƀôn sang khŏm pơplih rơđah rơđông, kiăng pơsit brơi bruă akŏ pơdong gong gai dua gưl mơ̆ng Gơnong dlông lĕ tơlơi lăp djơ̆ hăng tŭ yua”.

Mơ̆ng sa boh să juăt bruă ngă hmua, Hòa Phú hrơi anai glăk dưm atur blung a kiăng jing plơi prong mă yua boh thâo măi mok - bơwih bơwang hăng gru grua hiam phara, jing kual bơwih ƀong đĭ kyar gah Dơnung tơring čar Dak Lăk. Amăng hrơi blan ngă bruă amra hơmâo lu tơlơi tơnap, samơ̆ hăng pran jua kiăng hrưn đĭ, gir kơtir, kjăp bruă kơđi čar wơ̆t hăng tơlơi gum ngă mơ̆ng abih bang mơnuih ƀôn sang, să Hòa Phú glăk pơtrut pran đăo kơnang phrâo kơ boh tŭ yua mơ̆ng hơbô̆ bruă gong gai dua gưl, lăp djơ̆, hmao kru, hăng djơ̆ pran mơnuih ƀôn sang./.