Hơdôm mrô tơhnal pơkă lăi nao tơlơi thâo amăng bruă mă mơ̆ng tơring čar đĭ na nao hơdôm thun giăm anai.

Lơ 4/7/2023, Sang ia jrao prong anăn Xuyên Á Dap Kơdư hơmâo pơphun mă bruă tơgŭ man pơdong ƀơi tơring glông Čư̆ Jŭt, tơring čar Dak Nông. Ơi Nguyễn Văn Châu, Khua phun git gai sang ia jrao Xuyên Á, brơi thâo, tơlơi đing nao tŭ ư hrŏm mơ̆ng khua mua tơring čar Dak Nông, hăng ƀuh tơhnal pơkă tañ hloh lĕ mơak klă amăng bruă tuh pơ alin sĭ mơdrô ƀơi tơring čar, lu sang bruă sĭ mơdrô tañ hơmâo hră pơtrun brơi tuh pơ alin ƀơi tơring čar anai.

“Ră anai ƀing gơmơi hlăk nao pơ Dak Nông pioh tuh pơ alin sa amăng plĕ man pơdong 2 boh sang ia jrao : sa lĕ sang ia jrao ƀơi plơi prong Gia Nghĩa,  dua dơ̆ng lĕ ƀơi tơring glông Čư̆ Jŭt. Lăng glăi bruă mă tuh pơ alin, bruă ngă hmar hloh yơh yôm biă mă ñu. Kiăng kơ tañ lĕ khom ngă bruă tơpă, rơđah rơđong, pơhaih ba mơtam, khom pơsir na nao djop mơta bruă hơmâo ngă hiư̆m pă anom bruă tuh pơ alin dưi tŭ mă boh tơhnal tañ hloh”.

Ăt lăng pơtong yôm anŏ đing nao mơ̆ng khua mua tơring čar Dak Nông hăng ƀing ngă bruă sĭ mơdrô, ơi Hồ Tuấn Dũng, Kơ-iăng Khua git gai phun kông ty pơčruh ngăn mrô 471, brơi thâo, tơlơi dŏ gun juăt hơmâo lơ̆m sang bruă pơphun mă bruă pơkra glăi, pok prong jơlan 14 nao truh pơ amăng jang guai dêh čar či Bu Prâng lêng kơ pơsir tañ soh mơ̆n, pioh kơ ring bruă dưi čuk pơkra hmar, giong atañ hloh hrơi pơkă.

“Bơhmutu kah hăng rĭm wơ̆t hơmâo tơlơi gun amăng bruă čuk pơdăo jơlan lĕ, bruă pơsir anŏ gun pơkŏn lêng hơmâo tơlơi git gai tong ten mơ̆ng djop sang bruă, anom bruă, biă mă ñu khul khua mua wai lăng kơčăo bruă, mơ̆ng khua git gai tơring čar pioh pơsir tañ giong hĭ hơdôm anŏ gun, yua kơ anun dưi tŭ mă boh tơhnal klă hiam kah hăng ră anai”.

Tuh pơ alin amăng bruă wai lăng glai klô, pla kyâo ƀơi tơring glông Dak Song mơ̆ng hơdôm hơpluh thun rơgao, ơi Nguyễn Đức Hạnh, kông ty pơčruh ngăn uă pơkra hnăl kyâo MDF Bison Dak Nông, lăi lĕ:

“Amăng hrơi blan 5 thun giăm anai bruă đing nao hlâo hloh, gong gai kơnuk kơna ƀơi tơring čar, djru hrŏm mơ̆ng lu sang bruă kơnuk kơna hơmâo tơlơi dưi lĕ gơmơi ƀuh hmar hăng gêh găl biă mă. Ră anai, anom bruă gơmơi hơmâo pla glai ƀơi đơ đam lŏn tơring čar jao pla hăng pơgang tong ten kyâo glai”.

Hơdôm tơlơi pơtong lăng klă hiam mơ̆ng djop sang bruă sĭ mơdrô brơi ƀuh, anih tuh pơ alin sĭ mơdrô ƀơi tơring čar Dak Nông hlăk pơblih klă biă mă. Tơlơi anai, hơmâo čih pioh lơ̆m ƀuh rơnoh pơđĭ kyar rơnoh pơkă puang amăng tơring čar đĭ tui lu.

Rơđah biă ñu, hnong pơsir bruă mă ngă hră pơar PAR Index Dak Nông yap hnong dăp mrô mơ̆ng thun 2018 hơmâo hrưn đĭ truh mrô dăp tal 37/63 boh tơring čar amăng dêh čar ta thun 2022; rơnoh pơkă kơ bruă ngă hră pơar bơwih brơi mơnuih ƀôn sang mơ̆ng sang bruă kơnuk kơna (SIPAS) lĕ dong tal 31/63 boh tơring čar, đĭ tui 16 yak pơkă hăng thun 2021; rơnoh pơkă hnong pơhno nao rai sĭ mơdrô gưl tơring čar CPI dong tal 38/63 boh tơring čar đĭ tui 14 yak pơkă hăng thun 2021; mrô pơblih hơdră ngă hră pơar amăng bruă akŏ pơdong hăng pơđĭ kyar gong gai kơnuk kơna hăng điện tử, gong gai kơnuk kơna dăp dong tal 9/63 boh tơring čar, ƀôn prong.

Mah hnun, tui hăng ơi Đậu Anh Tuấn, Kơ-iăng khua čih pioh, Khua Khul wai lăng gah bruă tơlơi phiăn Khul ngă hrŏm sĭ mơdrô hăng tuh tia pơkra pơjing Việt Nam (VCCI), anai lĕ yak phrâo đôč pioh kơ tơring čar Dak Nông pơblih kơtang hloh amăng anih tuh pơ alin sĭ mơdrô, pơhưč tuh pơ alin. Yua kơ pơkă hăng hơdôm tơring čar nao hlâo, tơring čar pơdrong hloh, anŏ gêh găl gơñu amuñ hloh mơ̆n, bruă pơblih hơdră ngă hră pơar ƀơi Dak Nông khom pơtrut hmar hloh kah dưi pơhrua nao lu puang aka ƀu kơtang mơ̆ng tơring čar.

"Tơdah lăng nao amăng glông bruă dăp rơnoh PCI mơ̆ng tơring čar Dak Nông lĕ kiah hơmâo rơnoh pơkă kơ hrơi mông ba akŏ amăng dêh čar, dŏ glăi dăp mrô tong krah ƀudah tơdơi hloh. Yua kơ anun, Dak Nông khom pơblih na nao lu hloh amăng djop bruă mă, kah hăng mut phung anih anom sĭ mơdrô khom gêh găl hloh, tơlơi pơdjơ̆ nao lŏn mơnai kiăng pơsir kơtang hloh, laih anun pơhaih tong ten, rơđah rơđong..., hơmâo lu hơdră mơ̆ tơring čar Dak Nông kiăng ngă tui pơ anăp adih. Anŏ pơkă mơ̆ng blung a ƀơi Dak Nông ƀu gêh găl kah hăng lu tơring čar pơkŏn ôh, samơ̆ Dak Nông hơmâo tơlơi kiăng, Dak Nông lăng nao pơ anăo adih, Dak Nông hơmâo tơlơi gir run prong, yua kơ anun čang rơmang lĕ anŏ pơblih phrâo amăng hơdôm thun rơgao lĕ sa bruă ngă blung a, tơlơi pơblih phrâo amăng thun pơ anăp amra kjăp hloh, tong ten hloh dơ̆ng.