36 akŏ bruă gah 6 mơta bruă mă phun tơring čar Dak Lak pơdah thâo kiăng tuh pơ alin ngă hrŏm sĭ mơdrô. Amăng anun 8 mơta bruă gah bruă ngă hmua hăng pơkra ming boh čroh mơ̆ng đang hmua, 13 akŏ bruă gah bruă tuh tia pơkra ming–man pơdong, 8 kơčăo bruă sĭ mơdrô, bơwih bơwăng, tuai čuă ngui. Kơnong amăng bruă ngă hmua hăng pơkra ming boh čroh đang hmua đôč, tơring čar Dak Lak hơmâo tơlơi gêh găl prong mơ̆ng bruă pla pơjing truh pơ bruă pơkra ming jing gơnam sĭ mơdrô mơnong ƀong.

Khă hnun, ră anai bruă pơkra ming phrâo kiah ngă djop mơ̆ng 10-15% hăng rơnoh hơmâo. Tơdah jak iâu tŭ yua  8 mơta bruă mă gah đang hmua, pơkra ming tui hăng anăn Jơnum min mơnuih ƀôn sang tơring čar čih pơkra, amra djru kơ mơnuih ngă hmua hơđong bruă pơkra ming hăng man pơdong sang pioh pơkra ming, dưm amăng kơdung hruh laih anun pơjing rai anih pla pơjing hơđong, pơtum sa hnơ̆ng, pơtrut bruă ngă hmua tui hơdră pơkra ming gơnam sĭ mơdrô sa ƀut, hơmâo anih pơthâo anăn rơđah rơđong, djơ̆ tơhnal pơkă anŏ hiăm hơdjă rơgoh ñu.