Khul pơlir anom bơwih ƀong sĭ mơdrô Mi-APEC lĕ khul git gai mơng hơdôm gơnong bruă bơwih ƀong sĭ mơdrô pơdong ƀơi dêh čar Mi hăng hơmâo tơlơi mut hrŏm sui thun amăng APEC. Ƀing pơ ala hơdôm anom bơwih ƀong sĭ mơdrô dêh čar Mi rai mơng djop gơnong bruă phara hăng lu hloh lêng hơmâo akŏ bruă tuh pơ alin ƀơi Việt Nam. Khua mir sir lăng yôm bruă ngă hrŏm kơplah wah Việt Nam hăng Mi ƀu pơdơi pok prong hăng pơđĭ kyar kơtang tui tơdơi kơ giăm tlâo hơpluh thun ngă bơmơ-ak glăi tơlơi rô nao rai hăng rơbêh ha thun hrưn đĭ tơlơi rô nao rai ngă hrŏm djop mơta.

Khua mir sir pơsit tong Việt Nam glăk ƀu pơdơi ngă gêh gal tuh pơ alin bơwih ƀong sĭ mơdrô tui jơlan gah tong ten, rơđah rơđông, hơđong, lăp djơ̆ hăng tơlơi pơkă jar kmar kiăng pơhưč tuh pơ alin. Amăng thun blan pơplih yua boh thâo phrâo amăng bơwih ƀong tar ƀar rŏng lŏn tơnah, Khua mir sir brơi thâo Việt Nam čang rơmang ngă hrŏm kjăp hăng hơdôm anom bơwih ƀong sĭ mơdrô dêh čar Mi hăng amăng khul APEC amăng bruă yua boh thâo phrâo hăng pơplih pơčeh phrâo; apui lơtrik pơkra glăi hăng pơđĭ kyar mơtah.