Amăng hrơi mông mơ-ak jê̆ giăm, Khua dêh čar ơi Phạm Minh hok mơ-ak čơkă 60 čô nai pơtô ba gru, ƀing mơnuih hơmâo lu tơlơi pơgôp amăng bruă pơtô pơjuăt amăng lŏn ia ta, pơ ala brơi 1,6 klăk čô nai amăng đơ đam dêh čar. Khua dêh čar lăi pơtong, anăp nao rơnuk phâo, bruă pơtô pơjuăt tŏ tui lĕ bruă prong hloh; bruă pơtô hrăm amăng dêh čar kiăng khut khăt pơplih tong ten hăng djop mơta ƀiă dong, kiăng pơjing brơi kơ klă hăng pơčeh phrâo.

Kiăng ngă tui klă bruă jao yôm phăn anai, Khua dêh čar rơkâo djop ding jum, gơnong bruă, gong gai ƀon lan tŏ tui đing nao, djru brơi bruă pơtô pơjuăt; jak iâu pơgôp hăng mă yua klă djop ngăn rơnoh kiăng tuh pơ alin man pơdong anih pơtô hrăm; tŏ tui pơjing hăng pơđĭ kyar gru grua hrăm hră. Hrưn đĭ klă ƀing nai pơtô, mơnuih apăn bruă amăng pơtô pơjuăt. Khua dêh čar rơkâo, rĭm čô nai pơtô lĕ ƀing mơnuih ba gru hiam kơ gru hơdip, tơlơi thâo thăi, khăp kơ bruă mă, khăp kơ ană mơnuih, gum tơngan hrŏm pơjing rơnuk kơñ pơgi amăng lŏn ia pơđĭ kyar djop mơta.