Lâm Đồng hơmâo 1,5 klăk čô mơnuih, 47 djuai ania, amăng anun mơnuih djuai ania ƀiă dưm dưm 24,5%. Hơdôm thun rơgao, yua hơmâo tơlơi đing nao mơng Ping gah hăng kơnuk kơna amăng djop mơta, tơlơi hơdip mơda kơ mơnuih ƀôn sang amăng tơring čar lăi hrŏm, neh met wa djuai ania ƀiă hnun mơn jai hrơi pơplih phrâo. Sit biă ñu, bruă pơtrut pơsur “Abih bang mơnuih gum pơgôp man pơdong plơi pla phrâo, plơi prong hiam klă” hơmâo ba glăi boh tŭ yua yôm phăn. Truh ră anai, pơhrui mơng rĭm akŏ mơnuih amăng kual mơnuih djuai ania ƀiă ƀơi tơring čar Lâm Đồng truh 45 klăk prăk ha thun, mrô sang anŏ ƀun rin djop mơta hrŏ trun dŏ 3,2%.

Đơ đam tơring čar hơmâo 353 boh anom bơwih ƀong sĭ mơdrô yua mơnuih djuai ania ƀiă ngă pô, hăng mrô prăk tuh pơ alin 2.800 klai prăk; rơbêh 50 boh grup ngă hrŏm, anom bơwih ƀong hrŏm mă bơwih ƀong amăng djop bruă; 13 gơnam OCOP mơng mơnuih djuai ania ƀiă dưi tŭ yap tui hơnong pơkă 3 asar pơtŭ.