VOV4.Jarai - Tô̆ tui jơlan hơdră jơnum lok 9, mơguah lơ 14/3, hmư̆ Grŭp lăng tui akô̆ bruă lăi pơthâo glăi bôh tơhnal blung a kơ bruă dưm dăp hơdôm bôh anom jing anih anom mă bruă čar tơring glông, gưl să amăng rơwang mơng thun 2019-2021, Jơnum min apăn bruă Khua pơ ala mơnuih ƀôn sang dêh čar rơkâo ƀu ba tơbiă hơdră pơtrun pơmut hrom gưl tơring glông mut amăng plơi prong kiăng pơhlôm djơ̆ hăng bruă pơpha mơnuih mă bruă hăng pơkă kual plơi prong. Rơgao kơ lăng tui brơi ƀuh, hơdôm anih anom hmâo pơphun ngă rơguăt hmâo 8 bôh anom mă bruă čar gưl tơring glông hăng 561 bôh anom gưl să; 3.437 bôh ƀirô, khul grŭp ƀơi gưl să hăng 429 bôh ƀirô, khul grŭp ƀơi gưl tơring glông. Amăng rơwang mơng thun 2019-2021 hmâo pơkrem ngăn drăp kơnuk kơna năng ai ñu rơbêh kơ 2 rơbâo klai prăk. Khă hnun hai, yua kơ hrơi ngă tui dô̆ ƀiă anun ƀơi sa dua anih anom, abih bang prăk pơkrem hmâo akă pơhlôm djop kơ bruă mă yua kơ hơdôm hơdră bruă djru mơnuih apăn bruă, mơnuih mă bruă čar rơbêh tơdơi kơ dưm dăp./.

Siu H’ Prăk: Pơblang