VOV4.Jarai - Lăi rơđah amăng mông jơnum lăng nao rai mơng ataih kơ bŏng glăi hăng lŏn pơpư̆ ƀơi tơring čar Kontum pơphun amăng mơguah lơ 19/4 ƀơi Hà Nội, ơi Trần Quang Hoài, Kơ-iăng Khua Grŭp črâo ba bruă pơgang pơgăn ayuh hyiăng ƀu klă ngă dêh čar ta rơkâo, ƀu kŏng dong tah ia amăng dơnao ia hnoh ia gah hlâo Kontum amăng hơdôm hrơi anai. Mrô yap mơng Anom Vật lý Địa cầu, Anom kơsem min bôh thâo phrâo hăng Hơdră phrâo măi mok Việt Nam brơi ƀuh, hơdôm hrơi jê̆ hăng anai, rơđah biă ñu mơng blan 4 thun 2021 truh ră anai, hơdôm mrô yap brơi ƀuh tơlơi lŏn pơpư̆ truh ƀơi tơring glông Kon Plông hăng jum dar hmâo rơnoh truh na nao hăng kơtang tui, biă ñu amăng hơdôm hrơi lơ 15 hăng 18 blan 4 phrâo rơgao hmâo čih pioh tơlơi lŏn pơpư̆ na nao ƀơi kual anai hăng abih bang mrô 22 tal lŏn pơpư̆ hăng rơnoh mơng 2,5 truh kơ 4,5 đô̆ rích-te. Khă truh kơ ră anai akă hmâo čih pioh răm rai gah sang dô̆ hăng ană mơnuih ƀơi kual lŏn pơpư hai, hơdôm jua tơtar yua kơ lŏn pơpư̆ ba truh bơdjơ̆ nao laih tơlơi hơdip mơnuih ƀôn sang amăng kual./.   

Siu H’ Prăk: Pơblang