Tơlơi klah čun mrô 67 mơng Ding jum kơđi čar, tơlơi pơtrun mrô 72/2022/QH15 mơng Ƀirô Khua pơ ala mơnuih ƀon sang dêh čar pơdah tơlơi đing nao yôm phara mơng gơnong glông, ba glăi hơdră bruă hăng ngăn rơnoh kiăng man pơdong plơi prong Buôn Ma Thuột jing plơi prong phun ƀơi kual Dap kơdư.

Hơdôm hơdră bruă anai jing tơlơi pơkă bruă kơđi čar, tơhnal pơkă yôm phăn kiăng Dak Lak đing nao mă yua ngăn rơnoh tuh pơ alin, pơđĭ kyar Buôn Ma Thuột. Sit biă ñu, tơlơi pơtrun mrô 72 pơkă 5 tơhnal pơkă yôm phara kơ bruă prăk kak, ngăn drăp, dưm dăp, pơhưč tuh pơ alin hăng mơnuih mă bruă thâo rơgơi. Amăng anun, hơdră pơhrua 45% mrô prăk mă yua rese hơmâo ba glăi boh tŭ yua tong ten.

Rơwang thun 2021-2025, abih tih prăk tuh pơ alin pơđĭ kyar mơta amăng Buôn Ma Thuột truh rơbêh 125.000 klai prăk. Anih anom, jơlan glông, sang ia jrao, sang hră hơmâo đing nao pơkra; hơdôm kual tuh tia pơkra ming pơhưč lu akŏ bruă, pơgôp ngă hơkrŭ kjăp tơlơi gơgrong phun amăng plơi pla.

Samơ̆, ơi Cao Đình Huy, Khua gơnong bruă prăk kak tơring čar Dak Lak brơi thâo, boh tơhnal pơđĭ kyar aka ƀu lăp djơ̆ hăng tơlơi dưi. Amăng 10 hơnong pơkă phun, hơmâo 5 hơnong pơkă aka ƀu ngă djơ̆. Tơlơi bơwih ƀong huă amăng plơi prong aka ƀu hơmâo gơnong bruă hơpă ôh ba jơlan hlâo, aka ƀu pơhưč anom bruă tuh pơ alin phun hăng akŏ bruă pơprong. Bruă pơkra gơnam klă hloh, logistics, tuai čuă ngui klă hloh hăng pơlir amăng kual aka ƀu klă. “Hơmâo 3 hơdră bruă aka ƀu ba glăi boh tŭ yua sit nik. Blung a lĕ hơdră bruă đĭ tui mrô prăk dưi čan mơ̆ aka ƀu čan mă yua ôh. Dua dong lĕ hrŏ ƀiă mă jia hăng anom bơwih ƀong sĭ mơdrô aka ƀu hơmâo akŏ bruă djop tơlơi gal hăng tal tlâo dong lĕ hơdră pơhưč ƀing rơkơi kơhnâo aka ƀu dưi ngă ôh.”

 Hluai tui tơlơi klah čun mrô 67 hăng tơlơi pơtrun mrô 72, Dak Lak rơkâo gơnong glông tŏ ngă tui, pơplih pơkra hơdôm tơhnal pơkă hơmâo ngă ba glăi tŭ yua; kơsem min pơhrua hơdră bruă man pơkra anih anom, jơlan glông, pơplih mơtah, yua boh thâo phrâo, logistics hăng pơlir amăng kual. Dak Lak ăt rơkâo pok prong tơhnal pơkă pơhrui 45% mrô prăk mă yua rese, lăp djơ̆ hăng anih pơđĭ kyar phrâo, pơlir hăng hơdôm anih phun Buôn Ma Thuột-Buôn Hồ hăng Tuy Hòa-Đông Hòa.

Ơi Lương Nguyễn Minh Triết, Khua git gai Ping gah tơring čar Dak Lak pơsit tong, hơdôm tơhnal pơkă yôm phara mơ̆ gơnong glông jao brơi Buôn Ma Thuột lĕ tơlơi gal hăng tơlơi glăm ba prong mơng ƀon lan. Lơm tơring čar Dak Lak phrâo hơmâo anih pơđĭ kyar prong ƀiă, bruă tŏ tui hơdôm hơdră bruă anai kiăng pơlir hăng bruă dưm dăp man pơdong hrŏm amăng plơi prong Buôn Ma Thuột truh thun 2050, kơtưn pơlir nao rai hăng tŏ tui tơlơi gơgrong phun amăng plơi prong hăng đơ đam kual. “Tơlơi črâo trun hơmâo laih, bruă dưm dăp man pơdong ăt hơmâo lăi pơthâo, hơdôm bruă jao akŏ phun ăt hơmâo pơsit tong, tơlơi yôm hloh ăt lĕ bruă pơphun ngă tui. Bruă hơget dưi ngă ăt kiăng lăng glăi tơlơi dưi, yua hơget dưi ngă; bruă hơget aka ƀu dưi ăt kiăng lăng glăi tong ten, yua hơget aka ƀu dưi ngă.”

Ơi Nguyễn Đức Trung, kơ-iăng Khua anom hơdră bruă hăng bruă yôm phun dêh čar lăi pơtong tơhnal pơkă yôm phara amra ba glăi tŭ yua lơm pơlir hăng tơlơi gal pơphun ngă tui hăng bruă jak iâu, mă yua klă ngăn rơnoh. Gơnong glông tŭ yap, dong yua hơdôm tơlơi pơgôp mơng tơring čar, samơ̆ rơkâo ruai hơdră bruă akŏ phun, pơsir hĭ djơ̆ tơlơi gun, hơmâo pơtong tơlơi bơdjơ̆ nao hăng anŏ dưi ngă. “Tơhnal pơkă phara amra ba glăi tŭ yua lơm dưm dăp ngă djơ̆ hăng tơlơi rơkâo sit nik hăng pơlir hăng tơlơi gal pơphun ngă tui laih dong bruă mă yua klă hơdôm ngăn rơnoh. Tơhnal pơkă anai lĕ tơlơi kiăng, bơ bruă pơphun ngă tui lĕ bruă yôm hloh.”

 Bruă tŏ tui pơgiong hơdôm tơhnal pơkă yôm phara kiăng pơđĭ kyar Buôn Ma Thuột ƀu djơ̆ kơnong kiăng pơsir hĭ hơdôm tơlơi tơnap tap blung a đôč ôh ăt ngă pơtrut kiăng plơi prong tŏ tui tơlơi gơgrong phun, anih phun tơkuh nao rai hăng čung ba bruă pơđĭ kyar tơlơi bơwih ƀong huă-mơnuih mơnam amăng tơring čar Dak Lak phrâo hăng đơ đam kual Dap kơdư. Samơ̆ mơng tơlơi črâo trun, hơdră bruă truh boh than ba glăi sit nik ăt kiăng hơmâo tơlơi gir run kơtang hloh, tơlơi gơgrong hăng ngă tui khut khăt amăng pơphun bruă. Anai amra jing tơlơi akŏ phun kiăng pơjing tơlơi gal kơ tơhnal pơkă, ngăn rơnoh jing hơdôm tơlơi pơplih sit nik, ba Buôn Ma Thuột pơđĭ kyar bơkơnar hăng plơi prong tong krah amăng kual./.