Dak Lak ră anai hơmâo 104 anih hơmâo hră pơ-ar kuăi mă yua čuah pơtâo dŏ hrơi pơkă, amăng anun 12 pok hră kuăi mă yua kiăng djru brơi hơdôm akŏ bruă tuh pơ alin man pơdong, 14 pok hră hăng pơsit pơhrui glăi čuah pơtâo ngă soh amăng hơdôm akŏ bruă man pơdong, hăng abih tih brơi mă yua rơbêh 8,2 klăk met khô̆i.

Rơwang rơwang tal IV/2026, tơlơi kiăng mơng 44 ring bruă, akŏ bruă hăng ƀon lan giăm 690.000 met khô̆i. Lu akŏ bruă hơmâo pơsit tong anih mă, samơ̆ sa, dua anih wai lăng ăt lăi pơthâo ăt do kơƀah čuah pơtâo, gơnam yua man pơkra đĭ nua kơtang. Ơi Đỗ Hữu Huy, Khua Jơnum min mơnuih ƀon sang tơring čar Dak Lak brơi thâo, bruă anai lĕ yua sa, dua anih mă čuah pơtâo aka ƀu dưi ngă bruă yua gun kơ bruă lŏn mơnai, wai pơgang jum dar; gơnam ba sĭ ƀơi sa, dua anih mă aka ƀu lăp djơ̆ tơlơi rơkâo.

Khua Jơnum min mơnuih ƀon sang tơring čar Dak Lak rơkâo kiăng kiăo tui lăng djop mơng bruă mă yua, ba sĭ mơdrô mơng hơdôm anih anom truh pơ bruă pơdŭ pơgiăng hyu. Mrô jŭ yap kơ gơnam măi, prăk duh điện tử, duh jia hăng bruă pơdŭ pơgiăng kiăng tơkuh nao rai, pơlăng nao rai; mă yua boh thâo mrô, boh thâo ia rơgơi hăng mă rup rap mơng êkrang kiăng tañ ĕp ƀuh hơdôm bruă ngă soh, sit biă ñu kơ bruă mă lu đơi tơlơi pơkă, mă amăng mơmŏt mlă ƀudah ngă hră pơ-ar sĭ čuah pơtâo ča čot.

Hăng nua sĭ mơdrô, Khua Jơnum min mơnuih ƀon sang tơring čar Dak Lak rơkâo anom bruă bơdjơ̆ nao lăi pơthâo nua gơnam tam hmao tlôn, djơ̆ tơlơi sit nik ƀơi hơdôm anih mă yua, jŭ yap djơ̆ prăk duh mă yua, pơkra pơjing hăng pơdŭ pơgiăng; anăm brơi nua lăi pơthâo phara hăng nua sĭ mơdrô ră anai, ngă kơ anom bơwih ƀong kiăng pơđĭ nua hluai tui anih anom ngă gong jơlan. Hơdôm anom bruă kiăng čih nua tong ten, sĭ mơdrô djơ̆ nua ră anai, hơmâo hră pơ-ar djơ̆ nua sit nik; anăm đĭ mă nua gơnam, pioh dŏp ngă kơƀah gơnam, ngă hrŏm kiăng pơsit mă nua ƀduah đĭ nua brơi hơdôm anih anom pơdŭ pơgiăng. “Amăng hrơi blan pơ anăp khua mua Jơnum min amra kơtưn nao pel ĕp tô̆ tơnô̆ bơdjơ̆ nao hră pơ-ar, bruă mă yua, gơnam mă, nua sĭ mơdrô, hră pơ-ar duh prăk, bruă pơdŭ pơgiăng, laih dong bruă duh prăk kak hăng bruă ba sĭ brơi hơdôm akŏ bruă. Sit biă ñu hơdôm boh ƀon lan hơmâo nua đĭ trun ƀu hmao thâo, bruă lăi pơthâo kơƀah, dŏp lui gơnam ngă soh tơlơi pơkă. Lơm ƀuh hơdôm bruă ngă soh kiăng lăi pơthâo Jơnum min mơnuih ƀon sang tơring čar rơkâo hơdôm anom bruă pel ĕp glăi kiăng pơsit tong mơng anun pơsir hĭ djơ̆ tơlơi pơkă.”./.