Pơhiăp ƀơi mông jơnum, Khua Jơnum min djop djuai ania mơnuih mơnam Việt Nam ơi Đỗ Văn Chiến mơ-it hiăp bơni hơ-ơč tơpă hăng dơlăm hloh abih pran jua kơ lu tơlơi pơgôp hrŏm pran jua, tơlơi pơmin hăng tơlơi hur har mơ̆ng abih bang ƀing čih tơlơi pơhing phrâo amăng bruă gum pơgôp djop djuai ania mơnuih mơnam; laih anun lăi ƀing čih tơlơi pơhing ngă hrŏm na nao hăng anom bruă wai lăng djop djuai ania mơnuih mơnam Việt Nam, djop khul grup mơnuih tơpuôl amăng bruă mă ƀrô hơdor glăi tal 100 thun hrơi hơdor glăi Hră pơhing phrâo hơkrŭ Việt Nam.

Lăi pơthâo pơ anăp adih, Jơnum min djop djuai ania mơnuih mơnam, hrŏm hăng djop khul grup mut phung, mơnuih tơpuôl ƀơi gơnong dlông amra pok pơhai bruă mă phrâo, Khua Jơnum min djop djuai ania mơnuih mơnam ơi Đỗ Văn Chiến čang rơmang rim čô mơnuih čih tơlơi pơhing phrâo djru hrŏm tong ten hloh hăng bruă mă anai laih anun ngă bang bơngač hloh kơ tơlơi gum pơgôp djuai ania, tơlơi mă bruă thâo pơčeh phrâo, ia rơgơi pơyơr pran jua djơ̆ lăp mơ̆ng lu sang bruă sĭ mơdrô, mơnuih ƀôn sang, hrŏm hăng bruă man pơdong lŏn ia dêh čar ta yak nao amăng rơnuk phrâo hrưn đĭ mơ̆ng djuai ania.

­