VOV4.Jarai - Mơguah lơ 8/4, Ping gah ƀôn prong, Jơnum min mơnuih ƀôn prong Cần Thơ hmâo pơphun mông jơnum bưp ƀô̆ mơta ƀing git gai, mơnuih thâo rơgơi, thâo hră hăng Grŭp wai lăng hơdôm bôh Sang phơ̆t Nam tông Khmer, mơnuih hmâo arăng đăo gơnang amăng ƀôn prong Cần Thơ kiăng hơ-ư̆č hmưi Tết tui phiăn juăt Chôl Chnăm Thmây hăng tơlơi pơhing kơ bruă ngă tui bruă mă djuai ania thun 2021, pơsit jơlan gah thun 2022. Thun 2021 lĕ thun hmâo lu tơlơi tơnap, tơlơi lông yua bơbeč mơng ayuh hyiăng ƀu klă ngă, klin Covid-19 samơ̆ ƀôn prong Cần Thơ hmâo đing nao pơpha ngăn rơnoh kiăng ngă tui lu jơlan hơdră akô̆ bruă prong kiăng hơdôm hơdră bruă djuai ania dưi ngă tui djop tum, ba glăi bôh tơhnal. Ră anai, ƀôn prong glăk đing nao prăp lui pok pơhai ngă tui pơđĭ kyar bơwih ƀong, bôh thâo, mơnuih mơnam kiăng pơđĭ kyar ƀôn prong Cần Thơ; pok pơhai Jơlan hơdră pơkă mơng lŏn ia pơđĭ kyar bơwih ƀong – mơnuih mơnam kual djuai ania ƀiă hăng kual čư̆ siăng rơwang 2021-2030, ăt kah hăng bruă djuai ania rơwang 2021-2030, tơhnal lăng nao truh thun 2045. Anai lĕ tơhnal prong kiăng hơdôm anih anom hmâo lu tơlơi gal bơwih brơi, pơđĭ tui tơlơi hơdip neh wa djuai ania ƀiă./.

Siu H’ Prăk: Pơblang